Ɛsta

9 Di tɛm we dɛn fɔ fala di kiŋ in lɔ ɛn du wetin i se na di de we mek 13 insay di mɔnt we mek 12, dat na, di mɔnt we nem Eda.* Na dis de di Ju dɛn ɛnimi dɛn bin de op fɔ win dɛn pan di fɛt, bɔt wetin dɛn bin de ɛkspɛkt nɔ apin, di Ju dɛn bin win di wan dɛn we et dɛn. 2 Di Ju dɛn na ɔl di prɔvins dɛn we Kiŋ Aazuirɔs de rul kam togɛda na dɛn siti dɛn fɔ fɛt di wan dɛn we want fɔ du dɛn bad, ɛn nɔbɔdi nɔ bin ebul fɔ fɛt dɛn, bikɔs ɔl di pipul dɛn bin de fred dɛn. 3 Ɛn ɔl di prins dɛn na di prɔvins dɛn, di setrap* dɛn, di gɔvnɔ dɛn, ɛn di wan dɛn we de wok fɔ di kiŋ bin de sɔpɔt di Ju dɛn, bikɔs dɛn bin de fred Mɔdikay. 4 Mɔdikay bin dɔn bi impɔtant pɔsin na di kiŋ in os,* ɛn dɛn bin no am na ɔl di prɔvins dɛn, bikɔs Mɔdikay bin de gɛt pawa mɔ ɛn mɔ.

5 Di Ju dɛn win ɔl dɛn ɛnimi dɛn, dɛn kil dɛn wit sɔd ɛn dɔnawe wit dɛn; dɛn du ɛnitin we dɛn want to di wan dɛn we et dɛn. 6 Insay Shushan* we na di pales,* di Ju dɛn kil ɛn dɔnawe wit 500 man dɛn. 7 Dɔn dɛn kil Pashandeta, Dalfɔn, Aspeta, 8 Poreta, Adelia, Arideta, 9 Pamashta, Ɛrisay, Ɛriday, ɛn Vaizeta, 10 we na Eman in tɛn bɔypikin dɛn. Eman na Amɛdeta in bɔypikin ɛn na di Ju dɛn ɛnimi. Bɔt afta dɛn kil in bɔypikin dɛn, dɛn nɔ tek nɔn pan dɛn prɔpati dɛn.

11 Da de de dɛn tɛl di kiŋ ɔmɔs pipul dɛn, dɛn kil na di pales* na Shushan.*

12 Di kiŋ tɛl Kwin Ɛsta se: “Na di pales* na Shushan,* di Ju dɛn dɔn kil ɛn dɔnawe wit 500 man dɛn ɛn Eman in tɛn bɔypikin dɛn. Wetin dɛn dɔn du na di ɔda prɔvins dɛn we di kiŋ de rul? Wetin yu want aks fɔ naw? Dɛn go du am fɔ yu. Wetin bak yu want? Dɛn go du am.” 13 Ɛsta ansa se: “If i ɔrayt wit di kiŋ, lɛ dɛn alaw di Ju dɛn na Shushan* fɔ fɛt fɔ dɛnsɛf tumara jɔs lɛk aw dɛn dɔn du tide; ɛn lɛ dɛn ɛng Eman in tɛn bɔypikin dɛn pan di tik.” 14 So di kiŋ gi ɔda fɔ lɛ dɛn du dat. Dɛn pas lɔ na Shushan,* ɛn dɛn ɛng Eman in tɛn bɔypikin dɛn.

15 Di de we mek 14 insay di mɔnt we nem Eda, di Ju dɛn na Shushan* kam togɛda bak ɛn kil 300 man dɛn na Shushan,* bɔt dɛn nɔ tek nɔn pan dɛn prɔpati dɛn.

16 Di ɔda Ju dɛn na di prɔvins dɛn we di kiŋ de rul, dɛnsɛf kam togɛda ɛn fɛt fɔ dɛn layf. Dɛn dɔnawe wit dɛn ɛnimi dɛn, dɛn kil 75,000 pan di wan dɛn we et dɛn; bɔt dɛn nɔ tek nɔn pan dɛn prɔpati dɛn. 17 Dat apin di de we mek 13 insay di mɔnt we nem Eda, ɛn dɛn blo di de we mek 14, ɛn dɛn mek am di de fɔ it ɛn gladi gladi.

18 Di Ju dɛn na Shushan* bin kam togɛda di de we mek 13 ɛn di de we mek 14, ɛn dɛn blo di de we mek 15 ɛn dɛn mek am di de fɔ it ɛn gladi gladi. 19 Na dat mek di Ju dɛn we de na di ɔda siti dɛn mek di de we mek 14 insay di mɔnt we nem Eda de fɔ gladi gladi ɛn fɔ it, na de we dɛn de sɛlibret, ɛn na tɛm we dɛn de sɛn fud to dɛn kɔmpin dɛn.

20 Mɔdikay rayt dɛn tin ya we apin ɛn sɛn lɛta to ɔl di Ju dɛn we de na ɔl di prɔvins dɛn we Kiŋ Aazuirɔs de rul, di wan dɛn we de nia ɛn di wan dɛn we de fa. 21 I tɛl dɛn fɔ sɛlibret di de we mek 14 insay di mɔnt we nem Eda, ɛn di de we mek 15, ɛni ia, 22 bikɔs na dɛn dez dɛn de di Ju dɛn ɛnimi dɛn nɔ ambɔg dɛn, ɛn na da mɔnt de dɛn pwɛlat chenj to gladi gladi ɛn dɛn de fɔ kray chenj to de fɔ sɛlibret. Dɛn fɔ sɛlibret dɛn dez dɛn de as tɛm fɔ it ɛn gladi gladi ɛn as tɛm fɔ sɛn fud to dɛn kɔmpin dɛn ɛn fɔ gi gift to di wan dɛn we po.

23 Ɛn di Ju dɛn gri fɔ kɔntinyu di sɛlibreshɔn we dɛn dɔn stat ɛn fɔ du wetin Mɔdikay rayt tɛl dɛn. 24 Eman we na Amɛdeta di Agagayt in bɔypikin, ɛn we na ɔl di Ju dɛn ɛnimi, bin dɔn plan fɔ dɔnawe wit di Ju dɛn, ɛn i bin dɔn mek Pɔ, we min, dɛn balɔt, fɔ mek di Ju dɛn panik ɛn fɔ dɔnawe wit dɛn. 25 Bɔt we Ɛsta go bifo di kiŋ, di kiŋ rayt dɔkyumɛnt we se: “Lɛ di bad tin we i plan fɔ di Ju dɛn apin to am”; ɛn dɛn ɛng in ɛn in bɔypikin dɛn na di tik. 26 Na dat mek dɛn de kɔl dɛn dez dɛn de Purim, we kɔmɔt frɔm di nem Pɔ.* So, bikɔs ɔf ɔl di tin dɛn we dɛn bin dɔn rayt na dis lɛta ɛn bikɔs ɔf wetin di Ju dɛn dɔn si ɛn wetin dɔn apin to dɛn, 27 di Ju dɛn mek shɔ se dɛn de sɛlibret dɛn tu dez dɛn ya, natin nɔ de pwɛl am, dɛn, dɛn pikin dɛn, ɛn ɔl di wan dɛn we de jɔyn dɛn de sɛlibret am, ɛn dɛn fɔ du wetin dɛn dɔn rayt bɔt di fɛstival ɛni ia we di tɛm rich. 28 Ɛni jɛnɛreshɔn, famili, prɔvins, ɛn siti fɔ mɛmba dɛn de ya ɛn sɛlibret dɛn; ɛn di Ju dɛn nɔ fɔ stɔp fɔ sɛlibret di Purim fɛstival ɛn dɛn pikin dɛn nɔ fɔ lɛf fɔ mɛmba dɛn dez dɛn de.

29 Dɔn dɛn rayt sɛkɔn lɛta bɔt Purim. Ɛn Kwin Ɛsta, we na Abiel in galpikin, ɛn Mɔdikay we na Ju yuz ɔl di pawa we dɛn gɛt fɔ kɔnfam am. 30 Dɛn sɛn lɛta dɛn to ɔl di Ju dɛn we de na di 127 prɔvins dɛn we Kiŋ Aazuirɔs de rul, ɛn di lɛta dɛn bin gɛt wɔd dɛn we na tru ɛn we de mek pis de 31 fɔ kɔnfam se dɛn fɔ sɛlibret di Purim dez dɛn we di tɛm rich, jɔs lɛk aw Mɔdikay we na Ju ɛn Kwin Ɛsta bin dɔn tɛl dɛn fɔ du ɛn jɔs lɛk aw dɛn bin dɔn disayd se dɛn ɛn dɛn pikin dɛn go du, wit di fast we dɛn fɔ fast ɛn rili beg Gɔd. 32 Ɛn di kɔmand we Ɛsta gi kɔnfam dɛn tin ya bɔt Purim, ɛn dɛn rayt am na wan buk.