Job
6 Dɔn Job tɔk se:
2 “If nɔmɔ dɛn kin we di sɔfa we a de sɔfa
Ɛn put am na skel togɛda wit mi prɔblɛm dɛn!
3 Bay naw i go dɔn ɛvi pas di sansan na di si.
Na dat mek a de tɔk fulish tɔk dɛn.*
4 Di Ɔlmayti in aro dɛn dɔn chuk mi,
Ɛn a de drink dɛn pɔyzin;
Di fiaful tin dɛn we Gɔd de du de atak mi ɔlsay.
5 Yu tink se wayl dɔnki go kray we i gɛt gras,
Ɔ man kaw go kray we i gɛt tin fɔ it?
6 Pɔsin go it fud we nɔ gɛt tes if i nɔ put sɔl,
Ɔ pɔsin de ɛnjɔy fɔ tes jus frɔm plant we nɔ gɛt no flevɔ?
7 A nɔ gri fɔ tɔch dɛn kayn tin dɛn de.
Dɛn tan lɛk tin dɛn we de dɔti mi it.
8 A wish di tin we a aks fɔ go apin
Ɛn Gɔd go gi mi di tin we a want!
9 A wish Gɔd go gri fɔ dɔnawe wit mi,
Ɛn i go kil mi wit in an!
10 Dat go mek a blo,
A go jomp wit gladi-at pan ɔl we a gɛt pen we nɔ de dɔn,
Bikɔs a nɔ dinay wetin di Oli Wan se.
11 A gɛt trɛnk fɔ kɔntinyu fɔ wet?
Wetin go apin to mi we fɔ mek a kɔntinyu fɔ liv?*
12 Fɔ se mi trɛnk tan lɛk rɔk?
Ɔ na kɔpa dɛn tek mek mi flɛsh?
13 Fɔ se ɛni we de we a go ɛp misɛf
We dɛn dɔn tek ɔl di tin dɛn we a go yuz fɔ sɔpɔt misɛf?
14 Ɛnibɔdi we nɔ de sho lɔv we nɔ de chenj to in kɔmpin mɔtalman,
Na pɔsin we nɔ de fred di Ɔlmayti.
15 Mi yon brɔda dɛn wikɛd lɛk watasay we de flo ren sizin,
Lɛk watasay we de dray we ren sizin dɔn.
16 Dɛn dak bikɔs ɔf ays
Ɛn di sno we de mɛlt pan dɛn.
17 We di rayt tɛm rich, dɛn wata go dɔn ɛn dɛn nɔ go de igen;
We di ples wam, dɛn go dray.
18 Dɛn go chenj di say we dɛn bin de flo go;
Dɛn go flo go na di dɛzat ɛn dɛn go lɔs.
19 Di biznɛsman dɛn we de travul we kɔmɔt Tima de luk fɔ dɛn;
Di wan dɛn we de travul frɔm Shiba* de wet fɔ dɛn.
20 Dɛn de shem bikɔs dɛn abop na di rɔng say;
Dɛn kam de bɔt dɛn nɔ gɛt wetin dɛn want.
21 Na so una dɔn bi to mi;
Una dɔn si di fiaful tin dɛn we dɔn apin to mi, ɛn una dɔn fred.
22 A dɔn ɛva tɛl una se, ‘Una gi mi sɔntin,’
Ɔ aks una fɔ gi mi gift frɔm una jɛntri?
23 A dɔn aks una fɔ sev mi frɔm mi ɛnimi
Ɔ frɔm di wan dɛn we de sɔprɛs mi?
24 Tich mi, ɛn a go lisin;
Ɛp mi fɔ ɔndastand mi mistek.
25 Tru wɔd nɔ at fɔ yɛri!
Bɔt us bɛnifit de pan una kɔrɛkshɔn?
26 Fɔ se una de plan fɔ kɔrɛkt di tin dɛn we a de tɔk,
Di wɔd dɛn we man we dɛspret de tɔk, we briz de kɛr go?
27 Una de balɔt bak fɔ pikin we in mama ɛn papa dɔn day
Ɛn sɛl una yon padi!
28 So una tɔn luk mi,
A nɔ go lay bifo una.
29 Duya, una tink bak—una nɔ jɔj mi di rɔng we—
Una tink bak, bikɔs a stil de du wetin rayt.
30 Fɔ se mi mɔt nɔ de tɔk fia wan?
Fɔ se mi mɔt nɔ de no we sɔntin rɔng?