Job
16 Job tɔk se:
2 “A bin dɔn yɛri bɔku tin dɛn lɛk dis trade.
Bifo una kɔrej mi, una de ad pan mi pen!
3 Una nɔ go stɔp fɔ tɔk ɛmti wɔd dɛn?
Wetin mek una de ansa mi dis we?
4 Misɛf kin tɔk lɛk una.
If wetin de apin to mi na in de apin to una,
A go ebul tɔk bɔku tin bɔt una,
Ɛn shek mi ed pan una.
5 Bɔt a go tɔk wɔd dɛn we go kɔrej una,
Ɛn a go tɔk wɔd dɛn we go mek una fil fayn.
6 If a tɔk, mi pen nɔ go stɔp,
Ɛn if a lɛf fɔ tɔk, fɔ se mi pen go ridyus?
7 Bɔt naw Gɔd dɔn mek a dɔn taya;
I dɔn dɔnawe wit mi wan ol famili.*
8 I dɔn ol mi, ɛn dat na mi witnɛs,
Di dɔn we mi bɔdi dɔn dɔn de pruv dat.
9 In vɛksteshɔn dɔn mek mi at pwɛl, ɛn i kip grɔj agens mi.
I de gren in tit pan mi.
Mi ɛnimi dɔn chuk mi wit in yay.
10 Dɛn dɔn opin dɛn mɔt big big wan pan mi,
Dɛn dɔn slap mi fɔ fityay mi;
Di wan dɛn we de agens mi bɔku.
11 Gɔd dɔn an ova mi to smɔl bɔbɔ dɛn,
Ɛn i dɔn lɛf mi na wikɛd pipul dɛn an.
12 A nɔ bin gɛt prɔblɛm, bɔt i damej mi;
I ol mi biɛn mi nɛk ɛn dɔnawe wit mi;
Dɔn i mek mi in tagɛt.
13 In man dɛn we de shut aro sɔrawnd mi;
I chuk mi kidni ɛn i nɔ sɔri fɔ mi;
I trowe mi bitabita na grɔn.
14 I de atak mi lɛk we wata de mek wɔl fɔdɔm;
I de rɔsh pan mi lɛk fɛtman.
15 A dɔn so klos we pipul dɛn kin wɛr we dɛn at pwɛl fɔ kɔba mi bɔdi,
Ɛn a dɔn bɛr mi rɛspɛkt* na dɔti.
16 Mi fes rɛd bikɔs a de kray,
Ɛn daknɛs kɔba mi yay,
17 Pan ɔl we a nɔ du no bad
Ɛn mi prea piɔ.
18 E di grɔn, nɔ kɔba mi blɔd!
Lɛ i kray fɔ mi!
19 Ivin naw, mi witnɛs de na ɛvin;
Di wan we go tɔk fɔ mi de ɔp.
20 Mi kɔmpin dɛn de provok mi
We a de kray to Gɔd.
21 Lɛ sɔmbɔdi tɔk bitwin mɔtalman ɛn Gɔd,
Jɔs lɛk aw dɛn de tɔk bitwin mɔtalman ɛn in kɔmpin mɔtalman.
22 A nɔ gɛt lɔng tɛm fɔ liv,
Ɛn a de go na di say we a nɔ go kam bak.