Job
11 Zofa di Neamatayt tɔk se:
2 “Yu dɔn tɔk bɔku, yu tink se pipul dɛn go sɛt mɔt,
Ɔ yu tink se bɔku tɔk go mek pɔsin gɛt rayt?*
3 Yu tink se yu ɛmti tɔk go mek pipul dɛn sɛt mɔt?
Yu tink se nɔbɔdi nɔ fɔ kɔrɛkt yu fɔ yu provokin tɔk dɛn?
4 Yu de tɔk se, ‘Di tin dɛn we a de tich kɔrɛkt,
Ɛn a klin na yu yay.’
5 Bɔt if nɔmɔ Gɔd go tɔk
Ɛn ansa yu!
6 Da tɛm de, i go sho yu di sikrit dɛn we i sabi bikɔs i gɛt sɛns,
Bikɔs tru sɛns nɔ izi fɔ ɔndastand.
Dɔn yu go no se Gɔd nɔ want fɔ mɛmba sɔm pan yu mistek dɛn.
7 Yu ebul faynd awt di dip tin dɛn bɔt Gɔd,
Ɔ faynd awt ɔltin bɔt di Ɔlmayti?
8 I ay pas ɛvin. Wetin yu ebul du?
I dip pas di Grev.* Wetin yu ebul no?
9 I lɔng pas di wɔl,
Ɛn i wayd pas di si.
10 If i kech pɔsin ɛn kɛr am go na kɔt,
Udat go stɔp am?
11 I no we mɔtalman nɔ de tɔk tru.
We i si bad tin, yu nɔ tink se i go notis?
12 Bɔt di tɛm nɔmɔ we fulman go ɔndastand
Na we wayl dɔnki bɔn mɔtalman.
13 If nɔmɔ yu go rɛdi yu at
Ɛn pre* to Gɔd.
14 If yu an de pan bad, push am fa frɔm yu,
Ɛn nɔ alaw ɛnitin we nɔ rayt fɔ de na yu tɛnt.
15 Da tɛm de, yu go es yu ed ɛn nɔ shem;
Yu go tinap tranga wan ɛn nɔ fred.
16 Dɔn yu go fɔgɛt yu prɔblɛm;
Yu nɔ go mɛmba am jɔs lɛk aw yu nɔ go mɛmba wata we dɔn pas.
17 Yu layf go brayt pas san we de shayn santɛm;
Ivin di daknɛs na yu layf go tan lɛk mɔnin.
18 Yu go gɛt kɔnfidɛns bikɔs op de,
Ɛn yu go luk arawnd yu ɛn ledɔm wit kolat.
19 Yu go ledɔm ɛn nɔbɔdi nɔ go mek yu fred;
Dɔn bɔku pipul dɛn go kam fɔ mek yu ɛp dɛn.
20 Bɔt di wikɛd wan dɛn nɔ go si wetin go apin to dɛn;
Dɛn nɔ go gɛt say fɔ ɛskep go,
Ɛn di wangren op we dɛn gɛt na fɔ day.”