Job
20 Zofa di Neamatayt tɔk se:
2 “A vɛks bad bad wan,
Na dat mek di tin dɛn we de mɔna mi de mek a tɔk.
3 A dɔn yɛri kɔrɛkshɔn we tan lɛk kɔs to mi;
Mi ɔndastandin mek a want fɔ tɔk.
4 A shɔ se una sabi wetin a de kam tɔk,
Bikɔs na so i dɔn de frɔm di tɛm we mɔtalman* de na di wɔl;
5 Dat na fɔ se di wikɛd wan dɛn nɔ de gladi fɔ lɔng tɛm,
Ɛn di wan dɛn we nɔ lɛk Gɔd* de gladi fɔ shɔt tɛm.
6 Ilɛksɛf i gɛt pawa te go ɔp di skay,
Ɛn in ed de rich di klawd dɛn,
7 I go lɔs sote go jɔs lɛk in tɔylɛt;
Di wan dɛn we bin dɔn de si am go aks se, ‘We am?’
8 Dɛn go fɔgɛt am kwik kwik wan lɛk drim, ɛn dɛn nɔ go si am igen;
I go lɔs lɛk vishɔn na nɛt.
9 Di wan dɛn we bin dɔn si am nɔ go si am igen;
Dɛn nɔ go si am igen na di ples usay i bin de.
10 In pikin dɛn go aks di po wan dɛn fɔ ɛp dɛn,
Ɛn in yon an go gi bak di tin dɛn we i bin dɔn tek frɔm ɔda pipul dɛn.
11 In bon dɛn bin strɔng lɛk yɔŋman,
Bɔt i* go ledɔm wit am na di dɔti.
12 If bad tin swit na in mɔt,
If i ayd am ɔnda in tɔŋ,
13 If i tes am ɛn nɔ pit am,
Bɔt i kɔntinyu fɔ kip am na in mɔt,
14 In it go sawa na in mɔt;
I go tan lɛk kobra pɔyzin insay am.
15 I dɔn swɛla jɛntri, bɔt i go vɔmit am;
Gɔd go pul am kɔmɔt na in bɛlɛ.
16 I go sɔk kobra in pɔyzin;
Vaypa in tit dɛn* go kil am.
17 I nɔ go ɛva si watasay dɛn,
Di say dɛn usay bɔku ɔni ɛn bɔta de.
18 I go gi bak wetin i gɛt pan ɔl we i nɔ ɛnjɔy dɛn;*
I nɔ go ɛnjɔy di prɔfit we i mek frɔm in biznɛs.
19 I dɔn sɔprɛs di po wan dɛn ɛn kɔmɔt biɛn dɛn;
I dɔn siz os we i nɔ bil.
20 Bɔt i nɔ go gɛt wan kolat;
In jɛntri nɔ go ɛp am fɔ ɛskep.
21 Natin nɔ lɛf fɔ am fɔ gɛda;
Na dat mek in jɛntri nɔ go las.
22 We i dɔn jɛntri pasmak, na soso wɔri wɔri i go de gɛt;
Bɔku bɔku prɔblɛm dɛn go mit am.
23 As i ful-ɔp in bɛlɛ so,
Gɔd go sɛn in vɛksteshɔn pan am,
Bad tin dɛn go kam pan am lɛk ren.
24 We i rɔnawe frɔm wɛpɔn dɛn we dɛn mek wit ayɛn,
Aro dɛn we dɛn shut frɔm bo we dɛn mek wit kɔpa go chuk am.
26 In prɔpati dɛn go lɔs na tik tik daknɛs;
Faya we nɔbɔdi nɔ blo go bɔn am,
Ɛn trɔbul de wet fɔ di wan dɛn we go lɛf na in tɛnt.
27 Di skay go mek ɔlman no in sin;
Ɛn di wɔl go tinap agens am.
28 Flɔd go go wit in os;
Ɛvi ɛvi ren go kam di de we Gɔd go vɛks.
29 Na dis Gɔd de gi wikɛd pɔsin,
Di prɔpati we Gɔd dɔn disayd fɔ gi am.”