2 Kɔrintians

10 Mi, Pɔl, de beg una. A de falamakata Krays we de tek tɛm du tin ɛn we de du gud, pan ɔl we a de wit una fes-to-fes a luk lɛk pɔsin we nɔ impɔtant, bɔt we a nɔ de wit una a gɛt maynd fɔ tɔk. 2 A de beg una so dat we a kam a nɔ go nid fɔ mek maynd lɛk aw a fil se a fɔ du ɛn dil tranga wan wit di wan dɛn we de si wi as pipul dɛn we de tink lɛk mɔtalman.* 3 Pan ɔl we wi na mɔtalman,* wi nɔ de fɛt wɔ lɛk mɔtalman. 4 Di wɛpɔn dɛn we wi de yuz fɔ fɛt wɔ nɔto mɔtalman in yon, na Gɔd mek dɛn pawaful fɔ chenj* tin dɛn we rili rili strɔng. 5 Wi de chenj* di we aw pipul dɛn de tink ɛn ɔl di tin* dɛn we de mek i nɔ izi fɔ lɛ pipul dɛn no Gɔd, ɛn wi de kapchɔ di we aw pipul dɛn de tink so dat dɛn go obe di Krays; 6 ɛn wi dɔn rɛdi fɔ pɔnish ɔl di wan dɛn we nɔ de obe, afta una sho se una de rili obe pan ɔltin.

7 Una de jɔj tin dɛn bay aw una de si dɛn. If ɛnibɔdi rili biliv se in na Krays in yon, mek i tink bak bɔt dis: Jɔs lɛk aw in na Krays in yon, na so wisɛf na Krays in yon. 8 Ivin if a bost tumɔs bɔt di rayt we di Masta dɔn gi wi fɔ ɛp una fɔ tinap tranga wan ɛn nɔ fɔ mek una at pwɛl, a nɔ go shem. 9 A nɔ want mek i tan lɛk se a de tray fɔ yuz mi lɛta dɛn fɔ mek una fred. 10 Bikɔs dɛn se: “In lɛta dɛn gɛt wet ɛn dɛn pawaful, bɔt we i de wit wi, i nɔ tan lɛk se na in rayt dɛn ɛn wetin i de tɔk nɔ mek sɛns.” 11 Lɛ da kayn pɔsin de no se wetin wi de tɔk na wi lɛta dɛn we wi nɔ de, na in wi go du bak we wi de. 12 Wi nɔ gɛt maynd fɔ tek wisɛf ɔ kɔmpia wisɛf wit sɔm pipul dɛn we de tɔk fayn bɔt dɛnsɛf. Bɔt we dɛn de jɔj dɛnsɛf akɔdin to wetin dɛn tink se rayt ɛn kɔmpia dɛnsɛf wit dɛnsɛf, dɛn de sho se dɛn nɔ ɔndastand.

13 Wi nɔ go bost bɔt ɛnitin we nɔ de pan di wok we Gɔd gi wi, na di wok nɔmɔ we Gɔd dɔn gi wi, na in wi go bost bɔt, ɛn i sɛn wi to unasɛf. 14 Nɔto fɔ se wi de strɛch wisɛf tumɔs lɛk se wi nɔ bin rich to una, bikɔs na wi fɔs rich to una wit di gud nyuz bɔt Krays. 15 Wi nɔ de bost bɔt ɛnitin we nɔ de pan di wok we Gɔd gi wi, we min se wi nɔ de bost bɔt di wok we ɔda pɔsin dɔn du, bɔt wi de op se as una de kɔntinyu fɔ gɛt mɔ fet, di tin we wi dɔn du pan dis wi wok go go bifo. Dɔn wi go ebul fɔ du mɔ, 16 so dat wi go prich di gud nyuz na di ples dɛn we de fa frɔm una, fɔ mek wi nɔ go bost bɔt wetin ɔda pɔsin dɔn ɔlrɛdi du pan di wok we Gɔd gi am. 17 “Bɔt di wan we de bost fɔ bost bɔt Jiova.”* 18 Nɔto di wan we de tɔk fayn bɔt insɛf Jiova* de gladi fɔ, bɔt na di wan we In tɔk fayn bɔt.