Daniɛl

5 Kiŋ Bɛlshaza mek big pati fɔ wan tawzin pan in bigman dɛn, ɛn i bin de drink wayn bifo dɛn. 2 Afta we Bɛlshaza dɔn chak, i bin gi ɔda fɔ lɛ dɛn briŋ kam di gold ɛn silva kɔp dɛn we in papa we na Nɛbyukadnɛza bin dɔn tek frɔm di tɛmpul na Jerusɛlɛm, so dat in, in bigman dɛn, ɛn in ɔda wɛf dɛn go yuz dɛn fɔ drink. 3 Dɔn dɛn briŋ di gold kɔp dɛn we dɛn bin dɔn tek frɔm di tɛmpul na di tru Gɔd in os na Jerusɛlɛm, ɛn di kiŋ, in bigman dɛn, ɛn in ɔda wɛf dɛn yuz dɛn fɔ drink. 4 Dɛn drink wayn ɛn prez gɔd dɛn we dɛn mek wit gold, silva, kɔpa, ayɛn, wud, ɛn ston.

5 Wantɛm wantɛm, na de mɔtalman an apia ɛn bigin fɔ rayt na di plasta na di wɔl na di kiŋ in pales we de ɔpozit di stand fɔ put lamp, ɛn di kiŋ bin de si di an we i de rayt. 6 Dɔn di kiŋ pel* ɛn di tin dɛn we i bin de tink bɔt mek i fred, ɛn in ip shek ɛn in ni dɛn bigin fɔ jam jam dɛnsɛf.

7 Di kiŋ ala lawd wan mek dɛn kɔl di lukin-grɔn man dɛn, di Kaldian* dɛn, ɛn di pipul dɛn we de stɔdi di sta dɛn fɔ no bɔt di bambay. Di kiŋ tɛl di sɛnsman dɛn na Babilɔn se: “Ɛnibɔdi we rid dis raytin ɛn tɛl mi wetin i min, a go mek dɛn drɛs am wit pɔpul klos, wɛr gold chen na in nɛk, ɛn i go rul as di tɔd pɔsin na di kiŋdɔm.”

8 Dɔn ɔl di kiŋ in sɛnsman dɛn kam insay, bɔt dɛn nɔ ebul fɔ rid di raytin ɔ tɛl di kiŋ wetin i min. 9 So Kiŋ Bɛlshaza fred bad bad wan ɛn in fes pel; ɛn di bigman dɛn bin kɔnfyuz.

10 Bikɔs ɔf wetin di kiŋ ɛn in bigman dɛn se, di kwin kam na di ɔl usay dɛn mek di pati. Di kwin se: “E kiŋ, mek yu de sote go. Nɔ alaw wetin yu de tink bɔt fɔ mek yu fred, ɔ mek yu fes pel. 11 Wan man de na yu kiŋdɔm we gɛt di oli gɔd dɛn spirit. Insay yu papa in tɛm, i bin no bɔku tin dɛn, i bin de tink gud wan fɔ ɔndastand, ɛn i bin gɛt sɛns lɛk di sɛns we di gɔd dɛn gɛt. Yu papa, Kiŋ Nɛbyukadnɛza, bin mek am edman fɔ di prist dɛn we de ple majik, fɔ di lukin-grɔn man dɛn, fɔ di Kaldian* dɛn, ɛn fɔ di pipul dɛn we de stɔdi di sta dɛn fɔ no bɔt di bambay; E kiŋ, na dat yu papa bin du. 12 Daniɛl, we di kiŋ gi di nem Bɛltishaza, bin gɛt sɛns pasmak ɛn i bin no bɔt tin dɛn ɛn de tink gud wan fɔ ɔndastand, fɔ ɛksplen wetin drim dɛn min, fɔ ɛksplen parebul dɛn, ɛn fɔ sɔlv at at prɔblɛm dɛn. Lɛ dɛn kɔl Daniɛl, ɛn i go tɛl yu wetin i min.”

13 So dɛn briŋ Daniɛl bifo di kiŋ. Di kiŋ aks Daniɛl se: “Na yu na Daniɛl we dɛn kapchɔ na Juda, we mi papa pul kɔmɔt na Juda? 14 A yɛri se di gɔd dɛn spirit de insay yu ɛn dɛn se yu no bɔku tin, yu de tink gud wan fɔ ɔndastand ɛn yu gɛt sɛns pasmak. 15 Dɛn bin dɔn briŋ di sɛnsman dɛn ɛn di lukin-grɔn man dɛn bifo mi fɔ lɛ dɛn rid dis raytin ɛn tɛl mi wetin i min, bɔt dɛn nɔ ebul tɛl mi wetin di mɛsej min. 16 Bɔt a dɔn yɛri se yu ebul fɔ sho wetin tin dɛn min ɛn fɔ sɔlv at at prɔblɛm dɛn. If yu ebul fɔ rid di raytin ɛn tɛl mi wetin i min, dɛn go drɛs yu wit pɔpul klos, wɛr gold chen na yu nɛk, ɛn yu go rul as di tɔd pɔsin na di kiŋdɔm.”

17 Daniɛl tɛl di kiŋ se: “Yu kin kip yu gift dɛn ɛn gi yu prɛzɛnt to ɔda pipul dɛn. Bɔt a go rid di raytin to yu ɛn tɛl yu wetin i min. 18 E kiŋ, di Gɔd We De Pantap Ɔlman gi yu papa Nɛbyukadnɛza di kiŋdɔm ɛn mek i gret, dɔn i mek i gɛt ɔnɔ ɛn glori. 19 Bikɔs Gɔd mek i gret, ɔl di pipul dɛn, neshɔn dɛn, ɛn grup dɛn we de tɔk difrɛn langwej dɛn bin de fred am ɛn trimbul bifo am. Ɛnibɔdi we i want fɔ kil, i de kil am ɛn ɛnibɔdi we i want fɔ mek i liv, i de lɛf am lɛ i liv, ɛn ɛnibɔdi we i want fɔ es ɔp, i de es am ɔp ɛn ɛnibɔdi we i want fɔ disgres, i de disgres am. 20 Bɔt we i kam prawd ɛn trangayes we mek i du tin we i nɔ gɛt rayt fɔ du, dɛn pul am kɔmɔt na di tron na in kiŋdɔm, ɛn i nɔ bin gɛt rɛspɛkt igen. 21 Dɛn drɛb am kɔmɔt usay mɔtalman dɛn de, dɛn mek in at tan lɛk wayl animal at, ɛn i bin de liv wit di dɔnki dɛn na bush. I bin de it gras lɛk kaw dɛn, ɛn di dyu sok in bɔdi, te i kam fɔ no se na di Gɔd We De Pantap Ɔlman na in na di Rula na mɔtalman kiŋdɔm ɛn i de gi am to ɛnibɔdi we i want.

22 “Bɔt yu Bɛlshaza, we na in bɔypikin, yu nɔ put yusɛf dɔŋ pan ɔl we yu no ɔl dis. 23 Bifo dat, yu tɔn agens di Masta we de rul na ɛvin, ɛn yu mek dɛn briŋ di kɔp dɛn we bin de na in os. Dɔn yu, yu bigman dɛn, ɛn yu ɔda wɛf dɛn yuz di kɔp dɛn fɔ drink wayn ɛn prez gɔd dɛn we dɛn mek wit silva, gold, kɔpa, ayɛn, wud, ɛn ston, gɔd dɛn we nɔ de si natin, we nɔ de yɛri natin, ɛn we nɔ no natin. Bɔt yu nɔ gi glori to di Gɔd we yu layf ɛn ɔl wetin yu de du de na in an. 24 So na in sɛn dis an, ɛn na in mek di an rayt dis tin. 25 Ɛn na dis di an rayt: MINI, MINI, TIKƐL, ɛn PASIN.

26 “Dis na wetin di wɔd dɛn min: MINI min, Gɔd dɔn ridyus pan di tɛm we yu kiŋdɔm fɔ de ɛn i dɔn mek i ɛnd.

27 “TIKƐL min, dɛn dɔn we yu bɔt yu nɔ kɔmplit.

28 “PIRƐZ min, dɛn dɔn sheb yu kiŋdɔm ɛn gi am to di Mid dɛn ɛn di Pashian dɛn.”

29 Dɔn Bɛlshaza gi di ɔda, ɛn dɛn wɛr pɔpul klos pan Daniɛl ɛn wɛr gold chen na in nɛk; ɛn dɛn anawns se i go bi di tɔd rula na di kiŋdɔm.

30 Da sem nɛt de, dɛn kil Bɛlshaza we na di Kaldian kiŋ. 31 Dɔn di kiŋdɔm go to Darayɔs di Mid, ɛn i bin ol lɛk 62 ia so.