Sam
Devid in siŋ.
101 A go siŋ bɔt jɔstis ɛn lɔv we nɔ de chenj.
E Jiova, a go siŋ to yu fɔ prez* yu.
2 A go du tin wit sɛns ɛn waka tret na yu yay.
Ustɛm yu go kam to mi?
A go du wetin rayt we a de na mi os.
3 A nɔ go wach ɛnitin we nɔ gɛt yus.
A et di tin dɛn we di wan dɛn we dɔn lɛf fɔ du wetin rayt de du.
A nɔ go gɛt natin fɔ du wit dɛn.
4 A nɔ gɛt natin fɔ du wit di wan dɛn we gɛt wikɛd tin dɛn na dɛn at;
A nɔ go gri* fɔ du wetin bad.
5 A go mek ɛnibɔdi we de pwɛl
In neba in nem sikrit wan, sɛt in mɔt.
A nɔ go ɛnkɔrej ɛnibɔdi we prawd
Ɔ we de es insɛf ɔp.
6 A valyu di wan dɛn we de na di wɔl we fetful to yu,
Dɛn go de wit mi.
Di wan we nɔ gɛt wan blem* go wok fɔ mi.
7 Ɛnibɔdi we de ful ɔda pipul dɛn nɔ go de na mi os,
Ɛn ɛnibɔdi we de lay nɔ go de usay a de.*
8 Ɛvri mɔnin, a go mek ɔl di wikɛd wan dɛn na di wɔl sɛt dɛn mɔt,
So dat a go dɔnawe wit ɔl di wan dɛn we de du bad na Jiova in siti.