Neɔm
2 Di wan we de skata pipul dɛn dɔn kam fɔ yu.*
Una gayd di wɔl dɛn.
Una go de wach di rod.
Una rɛdi unasɛf ɛn pik trɛnk.
2 Jiova go mek Jekɔp gɛt glori bak,
Di kayn glori we Izrɛl gɛt,
Di wan dɛn we de pwɛl dɔn pwɛl dɛn land;
Dɛn dɔn pwɛl dɛn plant dɛn we jɔs bɔs.
3 Di shild dɛn we in pawaful man dɛn gɛt, dɛn pent am rɛd,
Ɛn di klos we in fɛtman dɛn wɛr na dip rɛd.
Di de we i de rɛdi fɔ go fɛt,
Di ayɛn dɛn pan in wɔ chariɔt dɛn de shayn lɛk faya,
Ɛn dɛn de muv muv di spia dɛn we dɛn mek wit junipa stik fɔ trɛtin.
4 Dɛn de rayd di wɔ chariɔt dɛn na di strit dɛn lɛk se dɛn ed nɔ de.
Dɛn bin de rɔn wit spid ɔp ɛn dɔŋ na di pɔblik ples* dɛn.
Di chariɔt dɛn de shayn lɛk stik dɛn we dɛn put faya pan fɔ yuz as layt, ɛn dɛn de flash lɛk laytnin.
5 I go kɔl in ɔfisa dɛn.
Dɛn go staga as dɛn de go.
Dɛn rɔsh go na di wɔl;
Dɛn rɛdi di tin dɛn we dɛn de yuz fɔ blɔk blɔk.
6 Di riva dɛn get go opin,
Ɛn di pales go fɔdɔm.*
7 Na dis dɛn dɔn disayd: Dɛn dɔn mek i shem,
Dɛn dɔn kɛr am go,
Ɛn in uman slev dɛn de kray lɛk dɔv dɛn,
As dɛn de nak nak dɛn bɔbi.*
8 Frɔm trade trade, Ninivɛ bin tan lɛk pul we gɛt wata,
Bɔt naw pipul dɛn de rɔnawe.
“Una tinap! Una tinap!”
Bɔt nɔbɔdi nɔ de tɔn bak.
9 Una lut silva, una lut gold!
Di valyu tin dɛn bɔku pasmak.
Ɔlkayn tin we gɛt valyu pak insay de.
10 Di siti ɛmti, nɔbɔdi nɔ de de, i dɔn pwɛl!
Dɛn de fred bad bad wan, dɛn ni dɛn de shek, dɛn ip dɛn de trimbul;
Fred de na dɛn ɔl fes.
11 We di ples usay di layɔn dɛn de liv, di say usay di yɔŋ layɔn dɛn de it,
Usay di layɔn de kɔmɔt wit in pikin dɛn,
We nɔbɔdi nɔ de mek dɛn fred?
12 Di layɔn bin de chɛr bɔku animal dɛn fɔ in pikin dɛn,
Ɛn i de kil animal dɛn fɔ in uman layɔn dɛn.
I de ful-ɔp di say we i de wit animal dɛn we i dɔn kil ɛn chɛr chɛr.
13 Jiova we gɛt bɔku bɔku sojaman dɛn se: “A de agens yu,
A go bɔn yu wɔ chariɔt dɛn te na smok nɔmɔ go lɛf,
Ɛn a go kil yu yɔŋ layɔn dɛn wit sɔd.
A go mek yu nɔ gɛt animal igen fɔ kech na di wɔl,
Ɛn dɛn nɔ go yɛri yu mɛsenja dɛn vɔys igen.”