Ɛzra

9 As wi dɔn fɔ du dɛn tin ya so, di prins dɛn kam mit mi ɛn tɛl mi se: “Di pipul dɛn na Izrɛl, di prist dɛn, ɛn di Livayt dɛn dɔn miks wit di pipul dɛn na di land dɛn we de rawnd wi, ɛn dɛn de put an pan di dɔti dɔti tin dɛn we dɛn de du; di tin dɛn we di Kenanayt dɛn, di Itayt dɛn, di Pɛrizayt dɛn, di Jɛbyusayt dɛn, di Amonayt dɛn, di Moabayt dɛn, di Ijipshian dɛn, ɛn di Amɔrayt dɛn de du. 2 Dɛn dɔn tek sɔm pan dɛn galpikin dɛn as wɛf fɔ dɛnsɛf ɛn fɔ dɛn bɔypikin dɛn. Naw dɛn, we na di oli pipul dɛn, dɔn miks wit pipul dɛn frɔm dɛn land dɛn de. Di prins dɛn ɛn di dɛpiti rula dɛn, na dɛn fɔs du dis bad tin.”

3 As a yɛri dis, a chɛr di klos we a wɛr ɔnda ɛn di klos we a wɛr pantap we nɔ bin gɛt sliv, ɛn a pul sɔm pan di ia na mi ed ɛn mi biabia, ɛn a sidɔm mi shɔk shɔk wan. 4 Dɔn ɔl di wan dɛn we gɛt rɛspɛkt* fɔ di Gɔd na Izrɛl in wɔd gɛda rawnd mi bikɔs ɔf di sin we di pipul dɛn we kɔmɔt Babilɔn dɔn kɔmit, ɛn a sidɔm mi shɔk shɔk wan te di tɛm we dɛn de mek di ivintɛm fud ɔfrin.

5 Ɛn we di tɛm kam fɔ mek di ivintɛm fud ɔfrin, a grap na di say we a bin sidɔm mi pwɛlat wan, wit mi klos we a wɛr ɔnda ɛn mi klos we a wɛr pantap we nɔ gɛt sliv ɛn we dɔn chɛr. Dɔn a nil dɔŋ ɛn es mi an dɛn to Jiova mi Gɔd. 6 Ɛn a se: “E mi Gɔd, a de rili shem ɛn a nɔ fit fɔ es mi ed ɛn luk ɔp to yu. E mi Gɔd, wi sin dɛn dɔn bɔku te dɛn dɔn ay pas wi ɛn di bad tin dɛn we wi dɔn du dɔn payl te rich na ɛvin. 7 Frɔm wi gret gret granpa dɛn tɛm te tide wi sin dɛn dɔn bɔku; ɛn bikɔs ɔf wi sin dɛn, yu dɔn gi wi, wi kiŋ dɛn, ɛn wi prist dɛn to di kiŋ dɛn na di land dɛn. Dɛn dɔn kil wi wit sɔd, dɛn dɔn kapchɔ wi, dɛn dɔn lut wi, dɛn dɔn disgres wi, ɛn na di sem tin de apin tide. 8 Bɔt fɔ shɔt tɛm naw, Jiova wi Gɔd, yu dɔn du wi gud bay we yu mek sɔm pan wi ɛskep ɛn bay we yu mek wi kam de na say we sef na yu oli ples. E wi Gɔd, yu du dis so dat wi go gladi ɛn fɔ mek wi gɛt smɔl bloblo pan wi slev layf. 9 Pan ɔl we wi na slev dɛn, yu we na wi Gɔd nɔ lɛf wi so pan wi slev layf, bɔt yu sho lɔv we nɔ de chenj to wi bifo di kiŋ dɛn na Pashia, fɔ gi wi nyu layf so dat wi go bil yu os we bin dɔn pwɛl ɛn fɔ mek wi de na Juda ɛn Jerusɛlɛm lɛk se wi de biɛn ston wɔl.*

10 “E wi Gɔd, wetin wi go se naw afta dis? Bikɔs wi dɔn lɛf fɔ fala yu lɔ dɛn, 11 we yu yuz yu savant dɛn we na di prɔfɛt dɛn fɔ gi wi ɛn tɔk se: ‘Di land we gɛt fɔ bi una yon na land we nɔ klin bikɔs di pipul dɛn we de de nɔ klin. Dɛn de du dɔti dɔti tin dɛn de ɛn di dɔti dɔti tin dɛn we dɛn de du de ɔlsay na di land. 12 So, una nɔ gi una galpikin dɛn to dɛn bɔypikin dɛn, ɔ tek dɛn galpikin dɛn fɔ una bɔypikin dɛn; ɛn una nɔ du natin fɔ mek dɛn gɛt kolat ɛn go bifo, so dat una go strɔng ɛn it di gud tin dɛn na di land ɛn gɛt di land fɔ una bɔypikin dɛn sote go.’ 13 Ɛn afta ɔl wetin dɔn apin to wi bikɔs ɔf di bad tin dɛn we wi bin du ɛn di bɔku bɔku sin dɛn—E wi Gɔd, pan ɔl dat yu nɔ dil wit wi akɔdin to wi sin dɛn, ɛn yu dɔn alaw wi we de na ya fɔ ɛskep— 14 wi fɔ pwɛl yu lɔ dɛn bak ɛn mared di pipul dɛn we de du dɛn dɔti dɔti tin ya? Yu nɔ go so vɛks pan wi dat yu go dɔnawe wit wi ɔl, ɛn nɔ lɛf ɛnibɔdi ɔ sɔm we go sev? 15 E Jiova di Gɔd na Izrɛl, yu de du wetin rayt, bikɔs sɔm pan wi dɔn sev te to dis de. Naw wi dɔn kam bifo yu wi gilti gilti wan, bikɔs afta ɔl wetin wi dɔn du wi nɔn nɔ gɛt di rayt fɔ tinap bifo yu.”