Job
10 “A et mi layf.
A go tɔk bɔt di we aw a de fil.
A go tɔk bɔt di tin dɛn we de rili mɔna mi!
2 A go tɛl Gɔd se: ‘Nɔ tɔk se a gilti.
Tɛl mi wetin mek yu de agens mi.
3 Us bɛnifit yu de gɛt we yu gladi fɔ wikɛd pipul dɛn advays
Bɔt yu de sɔprɛs pipul dɛn,
Ɛn yu nɔ valyu di tin dɛn we yu mek wit yu an?
4 Fɔ se na mɔtalman yay yu gɛt,
Ɔ yu de si lɛk aw mɔtalman de si?
5 Fɔ se yu layf tan lɛk mɔtalman in layf,
Ɔ di ia dɛn we yu de liv tan lɛk mɔtalman,
6 We fɔ mek yu wach fɔ mi mistek dɛn
Ɛn kɔntinyu fɔ luk fɔ mi sin dɛn?
7 Yu no se a nɔ gilti;
Ɛn nɔbɔdi nɔ ebul sev mi na yu an.
8 Na yu an yu yuz fɔ shep mi ɛn mek mi,
Bɔt naw yu go dɔnawe wit mi kpatakpata.
9 Duya, mɛmba se na dɔti yu tek mek mi,
Bɔt naw yu de mek a go bak na dɔti.
10 Nɔto yu tɔn mi lɛk milk
Ɛn mek a tik lɛk chiz?
11 Yu kɔba mi wit skin ɛn flɛsh,
Ɛn yu yuz bon ɛn mɔsul dɛn fɔ wiv mi.
12 Yu dɔn gi mi layf ɛn sho mi lɔv we nɔ de chenj;
Yu dɔn protɛkt mi layf bay we yu kia fɔ mi.
13 Bɔt yu plan fɔ du dɛn tin dɛn ya sikrit wan.*
A no se na yu mek dɛn tin dɛn ya de apin.
14 If a sin, yu go wach mi,
Ɛn yu nɔ go fɔgiv mi fɔ mi mistek.
15 If a gilti, na trɔbul fɔ mi!
Ilɛksɛf a inosɛnt, a nɔ go ebul es mi ed,
Bikɔs na soso shem ɛn disgres dɔn mit mi.
16 If a es mi ed ɔp, yu de luk fɔ mi lɛk layɔn,
Ɛn yu de sho mi yu pawa bak.
17 Yu briŋ nyu witnɛs dɛn agens mi,
Ɛn yu de vɛks pan mi mɔ ɛn mɔ,
As difrɛn difrɛn trɔbul dɛn de mit mi.
18 So wetin mek yu pul mi na mi mama in bɛlɛ?
A fɔ dɔn day bifo ɛnibɔdi si mi.
19 I bin fɔ tan lɛk se a nɔ bin ɛva liv;
Dɛn bin fɔ pul mi na mi mama in bɛlɛ ɛn kɛr mi go stret na di grev.’
20 Nɔto shɔt layf a gɛt? Lɛ i lɛf mi;
Lɛ i pul in yay pan mi, so dat a go blo smɔl*
21 Bifo a go na di land we dak pas ɔl
Ɛn a nɔ go kam bak,
22 Bifo a go na di land we rili dak,
Na di land usay shado ɛn kɔnfyushɔn de,
Usay ivin layt tan lɛk tik daknɛs.”