Sam
To di wan we de dayrɛkt; fɔ di myuzik we nem “Di Lili Dɛn.” Esaf in siŋ.
80 E Izrɛl in Shɛpad, lisin.
Yu we de protɛkt Josɛf in pipul dɛn lɛk ship.
Yu we sidɔm na tron pantap* chɛrɔb dɛn, shayn.
2 Sho yu pawa bifo Ifrem, Bɛnjamin, ɛn Manasɛ;
Kam sev wi.
3 E Gɔd, briŋ wi bak;
Sɔri fɔ wi, so dat wi go sev.
4 Jiova Gɔd we gɛt bɔku bɔku sojaman dɛn,
Aw lɔng yu go vɛks pan yu pipul dɛn
Ɛn nɔ lisin to dɛn prea?
5 Yu de gi dɛn kray wata as dɛn bred,
Ɛn yu de mek dɛn drink bɔku bɔku kray wata.
6 Yu mek wi neba dɛn de fɛt dɛnsɛf fɔ kɔntrol wi;
Yu mek wi ɛnimi dɛn de provok wi lɛk aw dɛn want.
7 E Gɔd we gɛt bɔku bɔku sojaman dɛn, briŋ wi bak.
Sɔri fɔ wi, so dat wi go sev.
8 Yu mek vayn kɔmɔt na Ijipt.
Yu drɛb di neshɔn dɛn ɛn plant am.
9 Yu mek ples fɔ plant am,
Dɔn i gro ɛn ful-ɔp di land.
10 In shado kɔba di mawntin dɛn,
Ɛn in branch dɛn kɔba Gɔd in sida dɛn.
11 In branch dɛn rich na di si,
Ɛn in plant dɛn we jɔs bɔs, rich na di Riva.*
12 Wetin mek yu dɔn brok di ston wɔl dɛn na di vayn gadin,
We mek ɔl di wan dɛn we de pas de pik in frut?
13 Di bush ɔg dɛn de pwɛl pwɛl am,
Ɛn di wayl animal dɛn de it am.
14 E Gɔd we gɛt bɔku bɔku sojaman dɛn, duya kam bak.
Luk frɔm ɛvin ɛn si wetin de apin!
Kia fɔ dis vayn,
15 Di plant* we jɔs bɔs we yu raytan dɔn plant,
Ɛn luk di bɔypikin* we yu dɔn mek strɔng fɔ yusɛf.
16 Dɛn kɔt am ɛn bɔn am wit faya.
Dɛn day we yu trɛtin dɛn.*
17 Duya, sɔpɔt di man we de na yu raytan,
Sɔpɔt mɔtalman pikin we yu dɔn mek strɔng fɔ yusɛf.
18 Da tɛm de, wi nɔ go kɔmɔt biɛn yu.
Mek wi kɔntinyu fɔ liv so dat wi go kɔl yu nem.
19 E Jiova Gɔd we gɛt bɔku bɔku sojaman dɛn, briŋ wi bak.
Sɔri fɔ wi, so dat wi go sev.