Sam
105 Tɛl Jiova tɛnki; yuz in nem we yu de pre to am.
Mek lɛ di pipul dɛn no di tin dɛn we i dɔn du!
3 Bost bɔt in oli nem.
Lɛ di wan dɛn we de luk fɔ Jiova gɛt gladi-at.
4 Luk fɔ Jiova ɛn abop pan in trɛnk.
Luk fɔ di say usay i de* ɔltɛm.
5 Mɛmba di wɔndaful wok dɛn we i dɔn du,
In mirekul dɛn ɛn di jɔjmɛnt dɛn we i dɔn anawns,
6 Una we na Ebraam we na in savant in pikin dɛn,
Una we na Jekɔp in bɔypikin dɛn, di wan dɛn we i dɔn pik.
7 In na Jiova, wi Gɔd.
In jɔjmɛnt dɛn de ɔlsay na di wɔl.
8 I de mɛmba in agrimɛnt sote go;
Di prɔmis we i mek to* in pipul dɛn,
9 Di agrimɛnt we i mek wit Ebraam,
Ɛn di swɛ we i swɛ to Ayzak,
10 We i mek as lɔ to Jekɔp
Ɛn as agrimɛnt we go de sote go to Izrɛl,
11 Bay we i se, “A go gi yu Kenan
Fɔ bi yu prɔpati.”
12 Dis na di tɛm we dɛn nɔ bin bɔku;
Di tɛm we dɛn bin rili smɔl, ɛn dɛn na bin fɔrina dɛn na di land.
13 Dɛn bin de waka frɔm wan neshɔn to ɔda neshɔn,
Frɔm wan kiŋdɔm to ɔda pipul dɛn.
14 I nɔ bin alaw ɛnibɔdi fɔ sɔprɛs dɛn,
Bɔt i bin kɔrɛkt kiŋ dɛn fɔ dɛn sek,
15 Bay we i se, “Nɔ tɔch di wan dɛn we a dɔn anɔynt,
Ɛn nɔ du bad to mi prɔfɛt dɛn.”
16 I mek dɛn gɛt bad bad angri na di land;
I mek dɛn nɔ gɛt tin fɔ it igen.
17 I bin sɛn wan man bifo dɛn
We dɛn bin sɛl as slev, we na Josɛf.
18 Dɛn tay in fut dɛn wit chen dɛn;
Dɛn put in nɛk insay ayɛn dɛn.
19 Te di tɛm we wetin i tɔk apin;
Di tin dɛn we Jiova de tɔk na in mek i klin.
20 Di kiŋ sɛn fɔ lɛ dɛn fri am,
Di wan we de rul di pipul dɛn fri am.
21 I mek am masta na in pales;
Na in bin de oba ɔl in prɔpati dɛn,
22 Fɔ de oba in prins dɛn lɛk aw i want,
Ɛn fɔ tich in bigman dɛn sɛns.
23 Dɔn Izrɛl kam na Ijipt,
Ɛn Jekɔp bin de as fɔrina na di land we nem Am.
24 Gɔd mek in pipul dɛn rili bɔku;
I mek dɛn pawaful pas in ɛnimi dɛn,
25 I alaw in ɛnimi dɛn at fɔ chenj so dat dɛn go et in pipul dɛn
Ɛn plan agens in savant dɛn.
26 I sɛn Mozis we na in savant
Ɛn Erɔn we i bin dɔn pik.
27 Dɛn pafɔm in sayn dɛn midul in pipul dɛn,
Dɛn pafɔm in mirekul dɛn na di land we nem Am.
28 I sɛn daknɛs ɛn di land dak;
Dɛn nɔ tɔn agens di tin dɛn we i se.
29 I tɔn dɛn wata dɛn to blɔd
Ɛn kil dɛn fish dɛn.
30 Dɛn land ful-ɔp wit frɔg dɛn,
Ivin na di say usay di kiŋ de.
31 I mek gadflay dɛn kam na di land
Ɛn natflay dɛn de ɔlsay na di land.
32 I tɔn dɛn ren to aysblɔk,
Ɛn i sɛn laytnin* na dɛn land.
33 I mek dɛn vayn ɛn dɛn fig stik dɛn day,
Ɛn i skata di stik dɛn we de na dɛn land.
34 I tɛl grasɔpa* dɛn fɔ kam na di land;
Yɔŋ grasɔpa dɛn we pɔsin nɔ go ebul kɔnt.
35 Dɛn it ɔl di plant dɛn na di land,
Ɛn dɛn it di tin dɛn we di grɔn de bia.
36 Dɔn i kil ɔl di fɔs pikin dɛn na di land;
Di fɔs pikin dɛn we dɛn bin dɔn bɔn.
37 I pul in pipul dɛn kɔmɔt de wit silva ɛn gold;
Nɔbɔdi nɔ bin de na in trayb dɛn we bin fɔdɔm.
38 Di pipul dɛn na Ijipt bin gladi we di Izrɛlayt dɛn kɔmɔt de,
Bikɔs di Ijipshian dɛn bin de rili fred di Izrɛlayt dɛn.
39 I put klawd fɔ ayd dɛn,
Ɛn i yuz faya fɔ gi dɛn layt na nɛt.
40 Dɛn aks fɔ bif, ɛn i gi dɛn kwel bɔd;
I kɔntinyu fɔ satisfay dɛn wit it we de kɔmɔt na ɛvin.
41 I opin rɔk, ɛn bɔku wata kɔmɔt de;
Di wata flo go na di dɛzat lɛk riva.
42 I du dat bikɔs i mɛmba di oli prɔmis
We i bin dɔn mek to Ebraam, we na in savant.
43 I pul in pipul dɛn kɔmɔt de wit gladi gladi;
I pul di wan dɛn we i dɔn pik kɔmɔt de wit gladi-at.
44 I gi dɛn di neshɔn dɛn land dɛn;
Dɛn gɛt wetin ɔda pipul dɛn dɔn wok tranga wan fɔ,
45 So dat dɛn go du wetin i dɔn se
Ɛn obe in lɔ dɛn.
Prez Ja!*