Job
13 “Fɔ tru, mi yay dɔn si ɔl dɛn tin ya,
Mi yes dɔn yɛri dɛn ɛn a ɔndastand dɛn.
2 A sabi wetin una no;
Una nɔ bɛtɛ pas mi.
3 If i lɛf to mi, a go lɛk fɔ tɔk to di Ɔlmayti insɛf sɛf;
A go want fɔ kɛr mi kes bifo Gɔd.
4 Bɔt na soso lay una de lay pan mi;
Una na dɔktɔ dɛn we nɔ gɛt wan yus.
5 If nɔmɔ una go sɛt una mɔt,
Dat go sho se una gɛt sɛns.
6 Duya, una lisin to wetin a de tɔk,
Ɛn pe atɛnshɔn we a de ɛksplen mi kes bifo Gɔd.
7 Una go tɔk fɔ Gɔd di kayn we we nɔ fia,
Ɛn una go lay fɔ am?
8 Una go tek di tru Gɔd in say,
Ɔ una go tray fɔ sɔpɔt am pan di kes?
9 If Gɔd chɛk una, i go gladi wit una?
Una go ebul ful am lɛk aw una go ful mɔtalman?
10 I go mɔs kɔrɛkt una
If una de tek wan pɔsin bɛtɛ pas ɔda pɔsin sikrit wan.
11 Fɔ se di ɔnɔ we i gɛt nɔ go mek una panik
Ɛn mek una fred am bad bad wan?
12 Una sɛns tɔk dɛn we una de tɔk tan lɛk ashis;
Una agyumɛnt dɛn wik lɛk kle.
13 Una sɛt una mɔt, so dat a go tɔk.
Dɔn lɛ ɛnitin we fɔ apin to mi, apin!
14 Wetin mek a de put misɛf pan denja*
Ɛn risk mi yon layf?
15 Pan ɔl we i go kil mi, a go stil wet;
A go pruv bifo am se a nɔ gilti.
16 Da tɛm de na in go sev mi,
Bikɔs pɔsin we nɔ lɛk Gɔd* nɔ go kam bifo am.
17 Una lisin to mi wɔd dɛn gud gud wan;
Una pe atɛnshɔn to wetin a de se.
18 Luk, a dɔn rɛdi mi kes;
A no se na mi gɛt rayt.
19 Udat go agyu wit mi?
A go day if a fɔ sɛt mi mɔt!*
20 E Gɔd, na tu tin dɛn nɔmɔ a want lɛ yu du fɔ mi,*
So dat a nɔ go ayd misɛf pan yu:
21 Pul yu ɛvi an kɔmɔt nia mi,
Ɛn nɔ mek di fred we a de fred yu mek a panik.
22 Kɔl mi ɛn a go ansa yu,
Ɔ mek lɛ a tɔk ɛn yu ansa mi.
23 Wetin na mi mistek dɛn ɛn mi sin dɛn?
Sho mi di bad tin we a dɔn du ɛn mi sin.
24 Wetin mek yu de ayd yu fes
Ɛn si mi as yu ɛnimi?
25 Yu go tray fɔ mek lif we briz de blo fred,
Ɔ yu go rɔnafta dray gras?
26 Yu de rayt bad bad tin dɛn we yu se a du,
Ɛn yu de pɔnish mi fɔ sin dɛn we a kɔmit we a bin yɔŋ.
27 Yu dɔn put mi fut dɛn na stɔk,*
Yu de tek tɛm wach ɔl usay a de waka.
Ɛn yu de wach ɔl mi futmak dɛn.