Sam
135 Prez Ja!*
Prez Jiova in nem;
Una we na Jiova in savant dɛn, una prez am,
2 Una we tinap na Jiova in os,
We de na di kɔmpawn we de na wi Gɔd in os.
3 Prez Ja, bikɔs Jiova gud.
Siŋ fɔ prez* in nem, bikɔs dat rili fayn.
4 Ja dɔn pik Jekɔp fɔ insɛf,
I dɔn pik Izrɛl fɔ bi in spɛshal prɔpati.*
5 A no gud gud wan se Jiova pawaful;
Wi Masta pawaful pas ɔl ɔda gɔd dɛn.
6 Jiova de du ɛnitin we i want fɔ du
Na ɛvin ɛn na di wɔl, na di si ɛn na di dip pat dɛn na di si.
7 I mek klawd go ɔp frɔm ɔlsay na di wɔl;
I de mek laytnin fɔ di ren;
I de pul di briz na in stɔ dɛn.
8 I bin kil di fɔs pikin dɛn
We mɔtalman ɛn animal dɛn bɔn na Ijipt.
9 I pafɔm sayn ɛn mirekul dɛn na Ijipt,
Fɔ pɔnish Fɛro ɛn ɔl in savant dɛn.
10 I dɔnawe wit bɔku neshɔn dɛn
Ɛn kil pawaful kiŋ dɛn;
11 Lɛk Sayɔn we na di kiŋ fɔ di Amɔrayt dɛn,
Ɔg di kiŋ na Beshan,
Ɛn ɔl di kiŋdɔm dɛn na Kenan.
12 I giwe dɛn land as prɔpati
To in pipul dɛn we na di Izrɛlayt dɛn.
13 E Jiova, yu nem go de sote go.
E Jiova, yu fem* go de frɔm jɛnɛreshɔn to jɛnɛreshɔn.
14 Jiova go fɛt fɔ in pipul dɛn,
Ɛn i go sho sɔri-at to in savant dɛn.
15 Di neshɔn dɛn aydɔl dɛn na silva ɛn gold,
We mɔtalman mek wit dɛn an.
16 Dɛn gɛt mɔt, bɔt dɛn nɔ ebul tɔk;
Dɛn gɛt yay, bɔt dɛn nɔ ebul si;
17 Dɛn gɛt yes, bɔt dɛn nɔ ebul yɛri.
Dɛn nɔ gɛt bloblo na dɛn mɔt.
18 Di pipul dɛn we mek dɛn ɛn di wan dɛn we abop pan dɛn,
Go tan jɔs lɛk dɛn.
19 E Izrɛl in famili, una prez Jiova.
E Erɔn in famili, una prez Jiova.
20 E Livay in famili, una prez Jiova.
Una we de fred Jiova, una prez Jiova.
21 Lɛ di pipul dɛn na Zayɔn prez Jiova,
Di Wan we de na Jerusɛlɛm.
Prez Ja!