Sam
Devid in siŋ.
141 E Jiova, a de kɔl yu.
Duya, kam ɛp mi kwik kwik wan.
Lisin to mi we a kɔl yu.
2 Lɛ mi prea tan lɛk insɛns we dɛn tek tɛm mek bifo yu,
Lɛ di es we a de es mi an fɔ pre to yu tan lɛk ivintɛm fud ɔfrin.
3 E Jiova, ɛp mi fɔ kɔntrol di tin dɛn we a de tɔk,
Ɛp mi fɔ tek tɛm wit wetin a de se.
4 Nɔ alaw mi at fɔ du ɛnitin we bad,
Fɔ jɔyn wikɛd pipul dɛn fɔ du bad tin dɛn;
Mek lɛ a nɔ ɛva it dɛn gud it dɛn.
5 If di wan we de du wetin rayt pɔnish mi,
Dat go sho se i gɛt lɔv we nɔ de chenj;
If i kɔrɛkt mi, i go tan lɛk ɔyl na mi ed,
We mi ed nɔ go ɛva tɔk se i nɔ want.
A go kɔntinyu fɔ pre ivin we dɛn gɛt prɔblɛm dɛn.
6 Pan ɔl we dɛn go trowe dɛn jɔj dɛn dɔŋ frɔm di ay pat na di mawntin,
Di pipul dɛn go pe atɛnshɔn to wetin a de se,
Bikɔs wetin a de se rili fayn.
7 Jɔs lɛk aw pɔsin de dig dig ɛn skata skata dɔti,
Na so dɛn dɔn skata skata wi bon dɛn na di Grev.*
8 E Jiova, di Masta We De Rul Ɔlman,
Na yu a de luk to.
Na yu a dɔn rɔn to fɔ ayd.
Nɔ tek mi layf.
9 Protɛkt mi frɔm di trap we dɛn dɔn sɛt fɔ mi,
Frɔm di trap dɛn we di wikɛd wan dɛn dɔn sɛt.
10 Ɔl di wikɛd wan dɛn go fɔdɔm na dɛn yon nɛt
Ɛn mi go pas de sef wan.