Sam
Maskil.* Esaf in siŋ.
74 E Gɔd, wetin mek yu dɔn pul an pan wi sote go?
Wetin mek yu at wam pan di ship dɛn we yu bin de kia fɔ?
2 Mɛmba di pipul dɛn we yu bin dɔn pik trade trade,
Di trayb we yu bin dɔn bay bak as yu prɔpati.
Mɛmba Mawnt Zayɔn, usay yu bin dɔn de.
3 Tɔn yu atɛnshɔn to di ples we dɔn pwɛl sote go.
Di ɛnimi dɔn pwɛl pwɛl ɔltin na di oli ples.
4 Yu ɛnimi dɛn de ala na yu ples usay pipul dɛn de gɛda.
Dɛn dɔn put dɛn yon bana dɛn as sayn dɛn de.
5 Dɛn bin tan lɛk man dɛn we de chap chap tik fɔrɛst wit aks dɛn.
6 Dɛn brok ɔl in dɛkɔreshɔn dɛn wit aks dɛn ɛn ayɛn ba dɛn.
7 Dɛn bɔn yu tɛmpul wit faya.
Dɛn dɔti di tabanakul we de ɔnɔ yu nem bay we dɛn pwɛl pwɛl am.
8 Dɛn ɛn dɛn pikin dɛn dɔn tɔk na dɛn at se:
“Dɛn fɔ bɔn ɔl di ples dɛn usay dɛn de wɔship Gɔd na di land.”
9 No sayn dɛn nɔ de fɔ lɛ wi si;
Prɔfɛt dɛn nɔ de igen,
Ɛn nɔbɔdi nɔ de wit wi we no aw lɔng dis go las.
10 E Gɔd, aw lɔng di ɛnimi go kɔntinyu fɔ provok?
Fɔ se di ɛnimi go sho se i nɔ de rɛspɛkt yu nem sote go?
11 Wetin mek yu nɔ want fɔ yuz yu raytan?
Pul am insay yu klos ɛn dɔnawe wit dɛn.
12 Bɔt Gɔd na mi Kiŋ frɔm trade trade,
Na in de sev in pipul dɛn na di wɔl.
13 Yu de yuz yu trɛnk fɔ kɔntrol di si;
Di big big animal dɛn na di si,
Yu de nyamanyama dɛn ed dɛn.
14 Yu nyamanyama Levayatan* in ed dɛn;
Yu gi am as it to di pipul dɛn, to di wan dɛn we de na di dɛzat dɛn.
15 Yu de opin di grɔn fɔ di spriŋ wata dɛn* ɛn di watasay dɛn;
Yu de dray riva dɛn we de rɔn ɔltɛm.
16 Na yu gɛt di de ɛn nɛt.
Na yu mek layt ɛn di san.
17 Yu mek ɔl di bawndri dɛn na di wɔl;
Na yu mek dray sizin ɛn ren sizin.
18 E Jiova, mɛmba di ɛnimi we de provok yu,
Mɛmba aw fulish pipul dɛn nɔ de sho rɛspɛkt fɔ yu nem.
19 Nɔ an ova yu tɔtuldɔv in layf to di wayl animal dɛn.
Yu pipul dɛn we de sɔfa, nɔ fɔgɛt dɛn sote go.
20 Mɛmba di agrimɛnt,
Bikɔs pipul dɛn we lɛk fɛt-fɛt de ayd
Ɛn wet na di dak ples dɛn na di wɔl.
21 Mek di wan dɛn we dɛn at pwɛl nɔ disapɔynt;
Mek di wan dɛn we dɛn nɔ tek mek natin
Ɛn di wan dɛn we po prez yu nem.
22 E Gɔd, grap, ɛn fɛt yu yon kes.
Mɛmba aw di fulish wan dɛn de provok yu ɔltɛm.
23 Nɔ fɔgɛt wetin yu ɛnimi dɛn de se.
Di nɔys we di wan dɛn we nɔ de lisin to yu de mek de go ɔp ɔltɛm.