Sam
Wan sɔri siŋ we Devid siŋ to Jiova bɔt di wɔd dɛn we Kush, di Bɛnjaminayt, bin tɔk.
7 E Jiova mi Gɔd, na yu de protɛkt mi.
Fri mi frɔm ɔl di wan dɛn we de mek a sɔfa, ɛn sev mi.
2 If nɔto dat, dɛn go chɛr chɛr mi lɛk aw layɔn de du,
Dɛn go kɛr mi go, ɛn nɔbɔdi nɔ go de fɔ sev mi.
3 E Jiova mi Gɔd, if a gɛt fɔlt pan dis,
If a nɔ du tin fia wan,
4 If a dɔn du bad to di wan we de du gud to mi,
Ɔ if a dɔn tek mi ɛnimi in prɔpati fɔ no rizin,
5 Lɛ mi ɛnimi rɔnafta mi ɛn kech mi;
Lɛ i mas mas mi na di dɔti
Ɛn mek a nɔ gɛt glori igen. (Sila)
6 E Jiova, duya grap bikɔs ɔf yu wamat;
Duya de agens mi ɛnimi dɛn we vɛks pan mi;
Duya ɛp mi ɛn du tin fia wan to mi.
7 Lɛ di neshɔn dɛn sɔrawnd yu,
Ɛn yu go du sɔntin to dɛn frɔm ɔp usay yu de.
8 Yu Jiova, go jɔj di pipul dɛn.
E Jiova, jɔj mi akɔdin to di we aw a de du wetin rayt
Ɛn akɔdin to di we aw a de waka tret na yu yay.
9 Duya, mek di bad tin dɛn we di wikɛd wan dɛn de du stɔp.
Bɔt mek lɛ tin kɔmɔt fayn fɔ di wan dɛn we de du wetin rayt,
Bikɔs yu na Gɔd we de du wetin rayt, we de chɛk wetin de na pɔsin in at,
Ɛn di we aw i rili de fil.
10 Gɔd na mi shild;
Na in de sev di wan dɛn we de du wetin rayt na dɛn at.
11 Gɔd na Jɔj we de du wetin rayt,
Ɛn Gɔd de anawns in jɔjmɛnt ɛvride.
12 If ɛnibɔdi nɔ de ripɛnt, Gɔd de shap in sɔd;
I de bɛn in bo ɛn rɛdi am.
13 I de rɛdi in bad bad wɛpɔn dɛn;
I de rɛdi in aro dɛn we gɛt faya.
14 Luk! Pɔsin de we de plan bad tin,
Ɛn jɔs lɛk aw pɔsin de bɔn pikin dɛn, na so i de kɔz trɔbul;
Na lay lay tɔk dɛn i de tɔk.
15 I de dig dip dip ol,
Bɔt na in go fɔdɔm insay di ol we i dig.
16 Di trɔbul we i de kɔz go apin to am;
Di wikɛd tin dɛn we i de du go bi to am.
17 A go prez Jiova fɔ we i de du tin fia wan;
A go siŋ fɔ prez* Jiova, di Wan We De Pantap Ɔlman, in nem.