Ɛkliziastis

6 Wan ɔda bad tin de we a si na di wɔl, ɛn i kɔmɔn to mɔtalman: 2 Di tru Gɔd de gi pɔsin jɛntri, prɔpati, ɛn glori so dat natin nɔ de we di pɔsin go want we i nɔ go gɛt.* Bɔt di tru Gɔd de mek i nɔ de ebul fɔ ɛnjɔy am, pan ɔl we strenja go ɛnjɔy am. Dis na vaniti ɛn na siriɔs prɔblɛm. 3 If pɔsin bi papa ɔndrɛd tɛm ɛn liv fɔ lɔng tɛm te i ol, bɔt i* nɔ ɛnjɔy di gud tin dɛn we i gɛt te i go na di grev, a go se pikin we dɛn bɔn day wan bɛtɛ pas am. 4 Bikɔs dɛn bɔn am fɔ natin, i tan lɛk se i day insay daknɛs, ɛn i nɔ gɛt nem. 5 Pan ɔl we i nɔ ɛva si di san ɔ no ɛnitin, i stil bɛtɛ pas* di fɔs wan. 6 Us bɛnifit pɔsin we liv tu tawzin ia go gɛt if i nɔ ɛnjɔy insɛf? Nɔto di sem ples dɛn ɔl de go?

7 Ɔl di tranga wok we mɔtalman de du na fɔ ful-ɔp in bɛlɛ, bɔt i nɔ de ɛva satisfay in apitayt.* 8 Us advantej sɛnsman gɛt pas fulman ɔ us bɛnifit poman gɛt we i no aw fɔ sɔvayv?* 9 I bɛtɛ fɔ ɛnjɔy wetin yu yay de si pas fɔ want sɔntin we yu nɔ go ebul fɔ gɛt. Dis bak na vaniti, i tan lɛk we pɔsin de rɔnafta briz.

10 Ɛnitin we bin dɔn de dɔn ɔlrɛdi gɛt nem, dɛn dɔn no aw mɔtalman de, ɛn i nɔ ebul fɔ agyu wit di wan we gɛt pawa pas am. 11 Di mɔ wɔd* dɛn we pɔsin tɔk, di mɔ vaniti. Us bɛnifit dis de briŋ to mɔtalman? 12 Udat no wetin gud we mɔtalman fɔ du insay di shɔt tɛm we i de liv in layf we tan lɛk shado? Udat go tɛl mɔtalman wetin go apin na di wɔl we i dɔn go?