Sam
To di wan we de dayrɛkt; di myuzik we nem “Nɔ Dɔnawe wit Mi.” Devid in siŋ. Miktam.* We Sɔl sɛn sɔm man dɛn fɔ go wach Devid in os ɛn fɔ kil am.
59 E mi Gɔd, sev mi frɔm mi ɛnimi dɛn;
Protɛkt mi frɔm di wan dɛn we de atak mi.
2 Pul mi na di wikɛd wan dɛn an,
Ɛn sev mi frɔm di wan dɛn we lɛk fɛt-fɛt.
3 E Jiova, luk! Dɛn de wet fɔ ambush mi;
Strɔng man dɛn de atak mi
Nɔto bikɔs a sin ɔ a du bad.
4 Pan ɔl we a nɔ du ɛni bad, dɛn de rɔn ɛn rɛdi fɔ atak.
We a kɔl yu, duya grap ɛn si wetin dɛn dɔn du.
5 E Jiova, di Gɔd we gɛt bɔku bɔku sojaman dɛn, na yu na di Gɔd fɔ di Izrɛlayt dɛn.
Wek ɛn tɔn yu atɛnshɔn to ɔl di neshɔn dɛn.
Nɔ sɔri fɔ ɛnibɔdi we wikɛd ɛn we de kɔmɔt biɛn in kɔmpin. (Sila)
6 Ɛni ivintɛm, dɛn de kam bak;
Dɛn de bak lɛk dɔg dɛn ɛn pas pas na di siti.
7 Luk wetin de kɔmɔt na dɛn mɔt;
Dɛn lip dɛn tan lɛk sɔd dɛn,
Bikɔs dɛn de aks se: “Udat de lisin?”
8 Bɔt, E Jiova, yu go laf dɛn;
Yu go provok ɔl di neshɔn dɛn.
9 E Gɔd, na yu de gi mi trɛnk, a go kɔntinyu fɔ wach fɔ yu;
Bikɔs yu na mi sef ples fɔ ayd.
10 Di Gɔd we de sho mi lɔv we nɔ de chenj go ɛp mi;
Gɔd go mek a si we mi ɛnimi dɛn de fel.
11 Nɔ kil dɛn, so dat mi pipul dɛn nɔ go fɔgɛt.
Yuz yu pawa fɔ mek dɛn de go ɔp ɛn dɔŋ;
E Jiova, wi shild, mek lɛ dɛn fel.
12 Bikɔs ɔf di sin we dɛn sin wit dɛn mɔt ɛn di wɔd we dɛn tɔk,
Ɛn bikɔs ɔf di swɛ we dɛn de swɛ ɛn di lay lay tin dɛn we dɛn de tɔk,
Lɛ di prawd we dɛn prawd bi trap fɔ dɛn.
13 Pul yu vɛksteshɔn pan dɛn ɛn dɔnawe wit dɛn;
Dɔnawe wit dɛn, so dat dɛn nɔ go de igen;
Mek lɛ dɛn no se na Gɔd de rul Jekɔp in pikin dɛn ɛn di say dɛn we fa pas ɔl na di wɔl. (Sila)
14 Lɛ dɛn kam bak ivintɛm;
Mek dɛn bak lɛk dɔg dɛn ɛn pas pas na di siti.
15 Lɛ dɛn pas pas fɔ fɛn tin fɔ it;
Nɔ mek lɛ dɛn satisfay ɔ fɛn say fɔ lɔj.
16 Bɔt as fɔ mi, a go siŋ bɔt yu trɛnk;
Na mɔnin a go gladi fɔ tɔk bɔt yu lɔv we nɔ de chenj,
Bikɔs yu na mi sef ples fɔ ayd
Ɛn di ples we a de rɔn go di tɛm we a gɛt prɔblɛm.
17 E Gɔd we de gi mi trɛnk, a go siŋ fɔ prez yu,
Bikɔs yu na mi sef ples fɔ ayd, yu na di Gɔd we de sho mi lɔv we nɔ de chenj.