Sam
Korah in bɔypikin dɛn siŋ.
48 Jiova gret, ɛn i fit fɔ gɛt prez
Na wi Gɔd in siti, na in oli mawntin.
2 Mawnt Zayɔn we de na di nɔt, fayn na in ay pozishɔn;
Na in de mek ɔlman na di wɔl
Ɛn na di Gret Kiŋ in siti gladi.
3 Na Mawnt Zayɔn in strɔng tawa dɛn
Gɔd dɔn mek ɔlman no se in na sef ples fɔ ayd.
4 Luk! Kiŋ dɛn dɔn kam togɛda;
Dɛn dɔn kam togɛda fɔ fɛt di siti.
5 We dɛn si am, dɛn sɔprayz.
Dɛn panik ɛn rɔnawe bikɔs dɛn fred.
6 Dɛn bigin fɔ trimbul de.
Dɛn gɛt pen we tan lɛk di pen we uman we de bɔn pikin kin fil.
7 Yu yuz di briz we de kɔmɔt na di ist fɔ pwɛl di ship dɛn na Tashish.
8 Na naw wi dɔn si fɔ wisɛf wetin wi bin dɔn yɛri
Na Jiova we gɛt bɔku bɔku sojaman dɛn in siti, na wi Gɔd in siti.
Gɔd go mek in siti tinap tranga wan sote go. (Sila)
9 E Gɔd, wi de tink bɔt yu lɔv we nɔ de chenj,
Insay yu tɛmpul.
10 E Gɔd, jɔs lɛk yu nem, di prez we wi de prez yu
De rich ɔlsay na di wɔl.
Yu raytan de du wetin rayt ɔltɛm.
11 Lɛ Mawnt Zayɔn gladi;
Lɛ di tɔŋ* dɛn na Juda gladi bikɔs ɔf yu jɔjmɛnt dɛn.
12 Mach rawnd Zayɔn; go rawnd am;
Kɔnt in tawa dɛn.
13 Una put una at pan in strɔng wɔl dɛn.
Una chɛk chɛk in strɔng tawa dɛn,
So dat una go tɔk bɔt am to di jɛnɛreshɔn dɛn we de kam.
14 Dis Gɔd na wi Gɔd sote go.
I go gayd wi sote go.*