Daniɛl

8 Insay di tɔd ia we Kiŋ Bɛlshaza de rul, mi, Daniɛl, si wan vishɔn, afta di wan we a bin dɔn si trade. 2 A si di vishɔn, ɛn as a bin de wach a bin de na di pales* na Shushan,* we bin de na di prɔvins na Ilam; a si di vishɔn, ɛn a bin tinap nia Riva* Yulay. 3 We a luk ɔp, a si wan man ship tinap bifo di riva, ɛn i bin gɛt tu ɔn dɛn. Di tu ɔn dɛn bin lɔng, bɔt wan bin lɔng pas in kɔmpin, ɛn di wan we bin lɔng pas in kɔmpin bin kam leta. 4 A si di man ship de rɔn go na di wɛst, di nɔt, ɛn di sawt fɔ atak, ɛn no wayl animal nɔ bin ebul fɔ tinap bifo am, ɛn nɔbɔdi nɔ bin de fɔ sev ɔda wan dɛn na in an. I bin de du wetin i want ɛn es insɛf ɔp.

5 As a bin de wach, a si wan man got we de kɔmɔt na di wɛst.* I bin de pas oba di wan ol wɔl, bɔt i nɔ bin de tɔch di grɔn. Ɛn di got bin gɛt wan big ɔn bitwin in yay dɛn. 6 I bin de kam to di man ship we bin gɛt di tu ɔn dɛn, we a bin dɔn si tinap bifo di riva; i bin de rɔn go to am wit bad bad wamat.

7 A si i de go nia di man ship, ɛn i bin vɛks pan am. I fɛt di man ship ɛn brok in tu ɔn dɛn, ɛn di man ship nɔ bin gɛt pawa fɔ fɛt am. I ib di man ship na grɔn ɛn mas mas am, ɛn nɔbɔdi nɔ bin de fɔ sev am na in an.

8 Dɔn di man got es insɛf ɔp pasmak, bɔt as i pawaful so, di big ɔn brok; dɔn 4 big ɔn dɛn kam tek in ples, ɛn dɛn pɔynt to di ist, wɛst, nɔt, ɛn sawt.*

9 Na de wan smɔl ɔn kɔmɔt pan wan pan dɛn, i gro big big wan; i pɔynt to di sawt, di ist,* ɛn di Dɛkɔreshɔn.* 10 I gro so big dat i rich to di ami we de na ɛvin, ɛn i mek sɔm pan di ami ɛn sɔm pan di sta dɛn fɔdɔm na di wɔl, ɛn i mas mas dɛn. 11 I es insɛf ɔp fɔ mek insɛf ikwal to di Prins fɔ di ami, i stɔp di tin we dɛn de du ɔltɛm* to am,* ɛn i brok di say we in oli ples de. 12 Ɛn dɛn an ova wan ami to di ɔn, wit di tin we dɛn de du ɔltɛm,* bikɔs ɔf sin; ɛn i kɔntinyu fɔ trowe ɔltin we gɛt fɔ du wit tru na grɔn, ɛn i bin de du tin dɛn ɛn go bifo pan wetin i de du.

13 A yɛri wan enjɛl de tɔk, ɛn ɔda enjɛl aks di wan we de tɔk se: “Aw lɔng di vishɔn ɛn di tin we dɛn de du ɔltɛm* ɛn di sin we de mek dɛn pwɛl tin dɛn go kɔntinyu, we de mek di oli ples ɛn di ami bi tin dɛn fɔ mas mas?” 14 So i tɛl mi se: “Pas te 2,300 ivintɛm ɛn mɔnintɛm pas; ɛn dɛn go mɔs mek di oli ples bak lɛk aw i fɔ de.”

15 We mi, Daniɛl, bin de wach di vishɔn ɛn de tray fɔ ɔndastand am, a jɔs si sɔmbɔdi we tan lɛk mɔtalman tinap bifo mi. 16 Dɔn a yɛri mɔtalman vɔys midul di Yulay, ɛn i tɔk se: “Gebrɛl, mek da pɔsin de ɔndastand wetin i si.” 17 So i kam nia usay a bin tinap, bɔt we i kam a bin so fred dat a fɔdɔm wit mi fes na grɔn. I tɛl mi se: “E mɔtalman pikin, a want mek yu ɔndastand se di vishɔn na fɔ di tɛm we di ɛnd go kam.” 18 Bɔt we i de tɔk to mi, a slip dip dip wan ɛn mi fes bin de na grɔn. So i tɔch mi ɛn mek lɛ a tinap usay a bin tinap. 19 Dɔn i tɛl mi se: “A de mek yu no wetin go apin di las pat insay di tɛm we Gɔd go vɛks, bikɔs na fɔ di tɛm we dɛn dɔn pik, dat na, di tɛm we di ɛnd go kam.

20 “Di man ship we gɛt tu ɔn dɛn we yu bin si, tinap fɔ di kiŋ dɛn na Midia ɛn Pashia. 21 Di man got we gɛt bɔku ia, tinap fɔ di kiŋ na Gris; ɛn di big ɔn we bin de bitwin in yay dɛn tinap fɔ di fɔs kiŋ. 22 As fɔ di ɔn we bin brok, we 4 ɔn dɛn kam tek in ples, 4 kiŋdɔm dɛn go kɔmɔt frɔm in neshɔn, bɔt dɛn nɔ go pawaful lɛk am.

23 “Ɛn di tɛm we dɛn kiŋdɔm go dɔn, we di sina dɛn go dɔn sin te dɛn kɔp ful-ɔp, wan kiŋ we ash we de ɔndastand wɔd dɛn we nɔ klia* go kam. 24 I go rili pawaful, bɔt nɔto bay in yon pawa. Di tin dɛn we i go pwɛl go so bɔku dat pipul dɛn go wɔnda, ɛn i go go bifo pan wetin i de du. I go dɔnawe wit pawaful pipul dɛn ɛn pipul dɛn we de pan di oli wan dɛn. 25 Ɛn bikɔs i kɔni, i go yuz lay lay we fɔ go bifo; ɛn i go fil tu big ɔf insɛf; ɛn di tɛm we pipul dɛn de fil sef,* i go dɔnawe wit bɔku pipul dɛn. I go ivin de agens di Prins fɔ prins dɛn, bɔt i go brok, bɔt nɔto mɔtalman an go brok am.

26 “Wetin dɛn se na di vishɔn bɔt di ivintɛm dɛn ɛn di mɔnintɛm dɛn na tru, bɔt yu fɔ kip di vishɔn sikrit, bikɔs i de tɔk bɔt tɛm we de fa frɔm naw.”

27 As fɔ mi, Daniɛl, a bin taya ɛn a sik fɔ sɔm dez. Dɔn a grap ɛn du di kiŋ in wok; bɔt di tin we a si ful-ɔp mi mɔt, ɛn nɔbɔdi nɔ ebul ɔndastand am.