Matyu
2 Afta dɛn bɔn Jizɔs na Bɛtliɛm, we de na Judia, insay Kiŋ Ɛrɔd* in tɛm, pipul dɛn we de stɔdi di sta dɛn fɔ no bɔt di bambay kɔmɔt na di Ist ɛn kam na Jerusɛlɛm 2 ɛn aks se: “We di Ju dɛn kiŋ we dɛn dɔn bɔn? Bikɔs wi bin si in sta we wi de na di Ist, ɛn wi dɔn kam fɔ sho am rɛspɛkt.”* 3 We Kiŋ Ɛrɔd yɛri dis, i bin fred ɛn ɔl di pipul dɛn na Jerusɛlɛm fred. 4 So i gɛda ɔl di edman dɛn fɔ di prist dɛn ɛn di Lɔ ticha dɛn ɛn aks dɛn usay dɛn fɔ bɔn di Krays.* 5 Dɛn tɛl am se: “Na Bɛtliɛm we de na Judia, bikɔs na dis di prɔfɛt bin rayt: 6 ‘Ɛn yu, O Bɛtliɛm we de na Juda, yu nɔto siti we nɔ impɔtant atɔl pan di siti dɛn we di gɔvnɔ dɛn na Juda de rul, bikɔs na frɔm yu sɔmbɔdi go kɔmɔt we go kam rul, we go tan lɛk shɛpad to mi pipul dɛn na Izrɛl.’”
7 Dɔn, sikrit wan, Ɛrɔd kɔl di pipul dɛn we de stɔdi di sta dɛn fɔ no bɔt di bambay ɛn tek tɛm aks dɛn ustɛm di sta apia. 8 We i de sɛn dɛn fɔ go na Bɛtliɛm, i tɛl dɛn se: “Una go tek tɛm wach fɔ di smɔl pikin, ɛn we una si am, una kam tɛl mi so dat misɛf go go sho am rɛspɛkt.” 9 We dɛn dɔn yɛri wetin di kiŋ tɔk, dɛn go dɛn we. Na de di sta we dɛn bin si we dɛn de na di Ist gayd dɛn te i kam stɔp oba usay di smɔl pikin de. 10 We dɛn si di sta stɔp, dɛn gladi pasmak. 11 We dɛn go insay di os, dɛn si di smɔl pikin wit in mama Meri, ɛn dɛn butu fɔ sho am rɛspɛkt. Dɔn dɛn opin dɛn bɔks dɛn usay valyu tin dɛn de ɛn gi am gift dɛn, dat na gold, frankinsɛns, ɛn ma.* 12 Bɔt bikɔs Gɔd bin yuz drim fɔ wɔn dɛn mek dɛn nɔ go bak to Ɛrɔd, dɛn yuz ɔda rod fɔ go na dɛn kɔntri.
13 We dɛn dɔn go, Jiova* in enjɛl apia to Josɛf na drim ɛn tɛl am se: “Grap, tek di smɔl pikin ɛn in mama ɛn rɔn go na Ijipt ɛn de de te a tɛl yu fɔ kam bak, bikɔs Ɛrɔd de kam luk fɔ di smɔl pikin fɔ kil am.” 14 So Josɛf grap da nɛt de ɛn tek di smɔl pikin ɛn di pikin in mama ɛn go na Ijipt. 15 I de de te Ɛrɔd day. Dis bin mek wetin Jiova* yuz in prɔfɛt fɔ tɔk kam tru, we i se: “A kɔl mi bɔypikin fɔ kɔmɔt na Ijipt.”
16 We Ɛrɔd si se di pipul dɛn we de stɔdi di sta dɛn fɔ no bɔt di bambay dɔn ful am, i vɛks bad bad wan ɛn sɛn mek dɛn kil ɔl di bɔypikin dɛn na Bɛtliɛm ɛn ɔl di eria dɛn we de arawnd de, frɔm tu ia kam dɔŋ, akɔdin to di tɛm we di pipul dɛn we de stɔdi di sta dɛn fɔ no bɔt di bambay bin dɔn sho am. 17 Dis bin mek wetin Gɔd bin yuz di prɔfɛt Jɛrimaya fɔ tɔk kam tru, we i se: 18 “Dɛn yɛri sɔmbɔdi de kray bita bita wan na Rema. Na Rechɛl de kray fɔ in pikin dɛn, ɛn i nɔ gri fɔ tek kɔrej bikɔs in pikin dɛn nɔ de igen.”
19 We Ɛrɔd day, Jiova* in enjɛl apia to Josɛf na drim insay Ijipt 20 ɛn tɛl am se: “Grap, tek di smɔl pikin ɛn in mama ɛn go na Izrɛl, bikɔs di wan dɛn we bin want fɔ kil di smɔl pikin* dɔn day.” 21 So i grap ɛn tek di smɔl pikin ɛn di pikin in mama ɛn go na Izrɛl. 22 Bɔt we i yɛri se nɔto Ɛrɔd de rul na Judia igen, na in pikin Akileɔs de rul, i fred fɔ go de. Pantap dat, bikɔs Gɔd bin wɔn am na drim, i go na Galili. 23 I kam de na wan siti we dɛn de kɔl Nazarɛt, so dat wetin Gɔd bin yuz di prɔfɛt dɛn fɔ tɔk go apin, we i se: “Dɛn go kɔl am Nazarin.”*