1 Tɛsalonians

1 Mi, Pɔl, a de wit Silvanɔs* ɛn Timoti. A de rayt to di kɔngrigeshɔn na Tɛsalonayka we gɛt wanwɔd wit Gɔd di Papa ɛn di Masta Jizɔs Krays:

Mek Gɔd in spɛshal gudnɛs* ɛn pis de pan una.

2 Wi kin tɛl Gɔd tɛnki ɔltɛm we wi de pre fɔ una ɔl. 3 Ɛn we wi de bifo wi Gɔd ɛn Papa, wi de kɔntinyu fɔ mɛmba di wok we una de du bikɔs una gɛt fet ɛn lɔv ɛn di bia we una de bia bikɔs una gɛt op pan wi Masta Jizɔs Krays. 4 Wi brɔda dɛn we Gɔd lɛk, wi no bɔt di pik we Gɔd pik una, 5 bikɔs we wi bin de prich di gud nyuz to una, nɔto tɔk nɔmɔ wi bin de tɔk, bɔt di mɛsej bin gɛt pawa ɛn oli spirit; ɛn di we aw wi tɔk bin sho se wi rili biliv, jɔs lɛk aw una no di kayn man dɛn we wi bin bi fɔ una sek we wi bin de wit una. 6 Ɛn una dɔn de falamakata wi ɛn di Masta, bikɔs una gɛt di gladi-at we di oli spirit de gi we una biliv di mɛsej pan ɔl we una bin de rili sɔfa. 7 So una dɔn bi ɛgzampul fɔ ɔl di wan dɛn we biliv di Masta na Masidonia ɛn Akeya.

8 Fɔ tru, una nɔ jɔs dɔn skata Jiova* in wɔd na Masidonia ɛn Akeya, bɔt pipul dɛn we de ɔlsay dɔn yɛri bɔt di fet we una gɛt pan Gɔd, so wi nɔ nid fɔ se ɛnitin igen. 9 Na dɛnsɛf sɛf de kɔntinyu fɔ tɔk bɔt di fɔs tɛm we wi mit una ɛn aw una dɔn lɛf una aydɔl dɛn ɛn tɔn to di tru Gɔd ɛn wok lɛk slev fɔ di Gɔd we de liv, 10 ɛn di wet we una de wet fɔ in Pikin we go kɔmɔt na ɛvin, we i gi layf bak, dat na Jizɔs we de sev wi frɔm Gɔd in vɛksteshɔn we de kam.