Osia
4 E pipul dɛn na Izrɛl, una yɛri wetin Jiova se,
Jiova gɛt kes agens di pipul dɛn na di land,
Bikɔs dɛn nɔ ɔnɛs, dɛn nɔ de sho lɔv we nɔ de chenj,
Ɛn dɛn de mek lɛk se dɛn nɔ no Gɔd.
2 Ɔlsay na di land, dɛn de swɛ lay lay swɛ dɛn, dɛn de kil, dɛn de lay,
Dɛn de tif, ɛn lɛf dɛn man ɛn wɛf dɛn ɛn go du mami ɛn dadi biznɛs wit ɔda pɔsin,
Ɛn dɛn de kil kil dɛnsɛf.
3 Na dat mek di land go kray
Ɛn ɔl di pipul dɛn we de de go wik te i lɛf smɔl fɔ mek dɛn day;
Di wayl animal dɛn, di bɔd dɛn we de flay na di skay,
Ɛn ivin di fish dɛn na di si, go day.
4 “So lɛ nɔbɔdi nɔ agyu wit di pipul dɛn ɔ kɔrɛkt dɛn,
Bikɔs yu pipul dɛn tan lɛk di wan dɛn we de agyu wit prist.
5 So yu go fɔdɔm san santɛm,
Ɛn di prɔfɛt dɛnsɛf go fɔdɔm jɔs lɛk we pɔsin de fɔdɔm na nɛt.
Dɔn a go mek yu mama day.
6 Mi pipul dɛn go day, bikɔs dɛn nɔ no mi.
Bikɔs yu nɔ gri fɔ no mi,
Misɛf nɔ go gri fɔ mek yu bi mi prist;
Dɔn bikɔs yu dɔn fɔgɛt yu Gɔd in lɔ,*
Misɛf go fɔgɛt yu bɔypikin dɛn.
7 Di mɔ we dɛn de bɔku, na di mɔ dɛn de sin agens mi.
A go chenj dɛn glori to disgres.*
8 Dɛn de gɛt tin fɔ it we mi pipul dɛn sin,
Ɛn dɛn want lɛ di pipul dɛn sin mɔ ɛn mɔ.
9 Di sem tin we apin to di pipul dɛn, na in go apin to di prist dɛn;
A go pɔnish dɛn fɔ wetin dɛn du,
Ɛn a go mek dɛn sɔfa fɔ di tin dɛn we dɛn de du.
10 Dɛn go it, bɔt dɛn nɔ go bɛlful.
Dɛn go liv fri layf,* bɔt dɛn nɔ go bɔku,
Bikɔs dɛn nɔ rɛspɛkt Jiova.
12 Mi pipul dɛn de tek advays frɔm dɛn aydɔl dɛn we dɛn mek wit wud,
Dɛn de du wetin dɛn staf tɛl dɛn;*
Bikɔs di tin we de mek dɛn de liv rare layf,* de mek dɛn go di rɔng we,
Ɛn dɛn rare layf* dɔn mek dɛn nɔ gri fɔ put dɛnsɛf ɔnda dɛn Gɔd.
13 Na pantap di mawntin dɛn, dɛn de sakrifays,
Ɛn na di il dɛn, dɛn de mek smok kɔmɔt pan dɛn sakrifays dɛn.
Dɛn de sakrifays ɔnda ok stik dɛn, storaks stik dɛn, ɛn ɔl di big stik dɛn,
Bikɔs dɛn gɛt fayn shed.
Na dat mek una galpikin dɛn de liv rare layf*
Ɛn una dɔtɛnlɔ dɛn de slip wit ɔda man dɛn.
14 A nɔ go pɔnish una galpikin dɛn bikɔs dɛn de liv rare layf,*
Ɛn a nɔ go pɔnish una dɔtɛnlɔ dɛn bikɔs dɛn de slip wit ɔda man dɛn.
Di man dɛn de go wit raregal dɛn,
Ɛn dɛn de sakrifays wit di raregal dɛn na di tɛmpul;
Dɛn kayn pipul dɛn de we nɔ gɛt sɛns go day.
15 E Izrɛl, pan ɔl we yu de liv rare layf,*
Nɔ mek Juda gilti.
Nɔ kam na Gilgal ɔ Bɛt-evɛn,
Nɔ swɛ se, ‘As lɔng as Jiova de alayv!’
16 Izrɛl dɔn stɔbɔn lɛk stɔbɔn kaw.
Fɔ se Jiova go kia fɔ dɛn naw
Lɛk we shɛpad de kia fɔ yɔŋ ship na opin say we gɛt gras?
17 Ifrem de wɔship aydɔl dɛn.
Lɛf am saful!
In rula dɛn* rili lɛk disgres.
19 Di briz go rap am* na in wiŋ dɛn,
Ɛn i go shem fɔ in sakrifays dɛn.”