Sam
71 E Jiova, na to yu a dɔn ayd.
Mek a nɔ ɛva shem.
2 Sev mi ɛn pul mi pan trɔbul,
Bikɔs yu de du wetin rayt.
Pe atɛnshɔn* to mi ɛn sev mi.
3 Bi mi strɔng rɔk
Usay a de go ɔltɛm.
Gi di kɔmand fɔ sev mi,
Bikɔs yu na mi rɔk ɛn mi sef ples fɔ ayd.
4 E mi Gɔd, pul mi na di wikɛd wan in an,
Sev mi frɔm di pɔsin we nɔ de trit mi fia wan
Ɛn we de sɔprɛs mi.
6 A dɔn abop pan yu frɔm we a bɔn;
Na yu pul mi na mi mama in bɛlɛ.
A de prez yu ɔltɛm.
7 A dɔn tan lɛk mirekul to bɔku pipul dɛn,
Bɔt na yu na mi sef ples fɔ ayd.
8 A go prez yu ol de ɛn tɔk bɔt aw yu fayn.
9 Nɔ trowe mi we a dɔn ol;
Nɔ lɛf mi we a nɔ gɛt bɛtɛ trɛnk igen.
10 Mi ɛnimi dɛn de tɔk bad bɔt mi,
Ɛn di wan dɛn we want fɔ kil mi
De mek bad plan togɛda.
11 Dɛn de tɔk se: “Gɔd dɔn lɛf am.
Una rɔnafta am ɛn kech am
Bikɔs nɔbɔdi nɔ de fɔ sev am.”
12 E Gɔd, nɔ kɔntinyu fɔ de fa frɔm mi.
E mi Gɔd, ɔri fɔ kam ɛp mi.
13 Lɛ di wan dɛn we de agens mi
Shem ɛn day.
Lɛ di wan dɛn we want lɛ bad tin mit mi
Rili shem ɛn disgres.
14 Bɔt as fɔ mi, a go kɔntinyu fɔ wet;
A go prez yu mɔ ɛn mɔ.
15 A go tɔk bɔt aw yu de du wetin rayt,
A go tɔk ol de bɔt aw yu de sev,
Pan ɔl we dɛn so bɔku dat a nɔ ebul fɔ kɔnt dɛn.
16 E Jiova, di Masta We De Rul Ɔlman,
A go kam tɔk bɔt di pawaful tin dɛn we yu de du.
A go tɔk bɔt aw yu de du wetin rayt.
Na dat nɔmɔ a go tɔk bɔt.
17 E Gɔd, yu dɔn tich mi frɔm we a yɔŋ,
Ɛn te naw, a de kɔntinyu fɔ tɔk bɔt di wɔndaful tin dɛn we yu de du.
18 E Gɔd, nɔ lɛf mi ivin we a dɔn ol ɛn pul wet ia.
Lɛ a tɛl di nɛks jɛnɛreshɔn bɔt yu pawa
Ɛn lɛ a tɛl ɔl di wan dɛn we de kam bɔt di pawaful tin dɛn we yu de du.
19 E Gɔd, di tin dɛn we yu de du di rayt we, rili bɔku;
Yu dɔn du bɔku wɔndaful tin dɛn;
E Gɔd, udat tan lɛk yu?
20 Pan ɔl we yu dɔn mek a go tru bɔku trɔbul ɛn waala,
Mek a gɛt trɛnk bak;
Pul mi na di dip dip say dɛn na di wɔl.*
21 Ad pan mi rɛspɛkt,
Dɔn sɔrawnd mi ɛn kɔrej mi.
22 Dɔn a go prez yu wit instrumɛnt we gɛt string
Bikɔs yu fetful, E mi Gɔd.
A go siŋ fɔ prez* yu wit ap,
E di Oli Wan na Izrɛl.
23 A go ala we a de siŋ wit gladi-at fɔ prez yu,
Bikɔs yu dɔn sev mi layf.
24 A go tɔk ol de bɔt* aw yu de du wetin rayt,
Bikɔs di wan dɛn we want fɔ dɔnawe wit mi go shem ɛn disgres.