Sam
To di wan we de dayrɛkt. Devid in siŋ.
20 Lɛ Jiova ansa yu di de we yu gɛt trɔbul.
Lɛ Jekɔp in Gɔd in nem protɛkt yu.
2 Lɛ i sɛn ɛp fɔ yu frɔm di oli ples,
Ɛn lɛ i ɛp yu frɔm Zayɔn.
3 Lɛ i mɛmba ɔl yu gift ɔfrin dɛn;
Lɛ i gladi fɔ tek yu bɔn ɔfrin.
4 Lɛ i mek yu gɛt ɔl wetin yu want
Ɛn lɛ i mek ɔl yu plan dɛn kɔmɔt fayn.
5 Wi go ala wit gladi-at fɔ we yu dɔn sev wi;
Wi go es wi bana dɛn fɔ prez wi Gɔd in nem.
Lɛ Jiova du ɔl wetin yu aks fɔ.
6 Naw a dɔn no se Jiova de sev di wan we i anɔynt.
I de ansa am frɔm ɛvin we oli
Bay we i de yuz in raytan fɔ sev am.
7 Sɔm pipul dɛn abop pan chariɔt dɛn ɛn ɔda pipul dɛn abop pan ɔs dɛn,
Bɔt wi de kɔl Jiova, we na wi Gɔd in nem.
8 Dɛn nɔ win, ɛn dɛn dɔn fɔdɔm;
Bɔt wi dɔn grap ɛn dɔn gɛt trɛnk bak.
9 E Jiova, sev di kiŋ!
I go ansa wi di de we wi kɔl to am fɔ ɛp.