Ɛzra
3 We di mɔnt we mek sɛvin kam ɛn di Izrɛlayt* dɛn bin de na dɛn siti dɛn, dɛn ɔl gɛda togɛda na Jerusɛlɛm fɔ wan tin. 2 Jɛshwa, we na Jɛɔzadak in bɔypikin, ɛn in kɔmpin prist dɛn ɛn Zɛrubabɛl, we na Shialtiɛl in bɔypikin, ɛn in brɔda dɛn grap ɛn bil di Gɔd na Izrɛl in ɔlta. Dɛn du dat fɔ mek dɛn go bɔn sakrifays dɛn pan am, jɔs lɛk aw dɛn rayt na di Lɔ we Gɔd Gi Mozis we na di tru Gɔd in savant.
3 So dɛn bil di ɔlta na di say we i bin de, pan ɔl we dɛn bin de fred di pipul dɛn we de na di land dɛn we de rawnd dɛn. Dɔn dɛn bigin fɔ bɔn sakrifays dɛn pan am to Jiova, di sakrifays dɛn we dɛn de bɔn na mɔnin ɛn ivintɛm. 4 Dɔn dɛn sɛlibret di Bafa Fɛstival jɔs lɛk aw dɛn bin dɔn rayt na di Lɔ, ɛn ɛvride dɛn bin de mek di bɔn sakrifays dɛn we dɛn fɔ mek. 5 Afta dat, dɛn kɔntinyu fɔ mek di bɔn ɔfrin dɛn we dɛn fɔ mek ɛvride, di nyu mun ɔfrin dɛn ɛn ɔl di wan dɛn fɔ Jiova in oli fɛstival sizin dɛn, wit di ɔfrin dɛn we ɛnibɔdi mek-ɔp in maynd fɔ gi to Jiova. 6 Dɛn bigin fɔ bɔn sakrifays dɛn to Jiova frɔm di fɔs de insay di mɔnt we mek sɛvin pan ɔl we dɛn nɔ bin dɔn le Jiova in tɛmpul in fawndeshɔn yet.
7 Dɛn gi mɔni to di wan dɛn we de kɔt ston ɛn di wan dɛn we sabi wok wit dɛn an, ɛn dɛn gi fud, drink, ɛn ɔyl to di Saydonian dɛn ɛn di Tirian dɛn fɔ mek dɛn briŋ kam sida tik dɛn frɔm Libanɔn to Jopa bay si, jɔs lɛk aw Kiŋ Sayrɔs na Pashia dɔn gi dɛn di rayt fɔ du.
8 Insay di sɛkɔn mɔnt, na di sɛkɔn ia afta dɛn dɔn kam na di tru Gɔd in os na Jerusɛlɛm, Zɛrubabɛl we na Shialtiɛl in bɔypikin, Jɛshwa we na Jɛɔzadak in bɔypikin ɛn ɔl dɛn brɔda dɛn, di prist dɛn, di Livayt dɛn, ɛn ɔl di wan dɛn we dɛn bin kapchɔ we dɔn kam na Jerusɛlɛm bin bigin di wok; dɛn pik Livayt dɛn we ol frɔm 20 ia go ɔp fɔ supavays di wok we dɛn de du na Jiova in os. 9 So Jɛshwa, in bɔypikin dɛn ɛn in brɔda dɛn, ɛn Kadmiɛl ɛn in bɔypikin dɛn, we na Juda in bɔypikin dɛn, jɔyn togɛda fɔ supavays di wan dɛn we de wok na di tru Gɔd in os, togɛda wit Ɛnadad in bɔypikin dɛn, ɛn dɛn brɔda dɛn we dɛnsɛf na Livayt dɛn.
10 We di wan dɛn we de bil le Jiova in tɛmpul in fawndeshɔn, di prist dɛn we wɛr dɛn prist klos dɛn ɛn ol trɔmpɛt dɛn, ɛn di Livayt dɛn, we na Esaf in bɔypikin dɛn, we ol simbal dɛn, tinap fɔ prez Jiova lɛk aw Kiŋ Devid we bin de na Izrɛl bin dɔn se. 11 Ɛn dɛn bigin fɔ tɛl Jiova tɛnki ɛn prez am. Dɛn bin de siŋ bay tɔn se: “I gud; ɛn i go kɔntinyu fɔ sho Izrɛl lɔv we nɔ de chenj sote go.” Dɔn ɔl di pipul dɛn ala lawd lawd wan fɔ prez Jiova bikɔs dɛn dɔn le di fawndeshɔn fɔ Jiova in os. 12 Bɔku pan di prist dɛn, di Livayt dɛn, ɛn di wan dɛn we de bifo na dɛn papa say—di ol pa dɛn we bin si di os we bin de trade—kray lawd lawd wan we dɛn si we dɛn de le dis os in fawndeshɔn. Dɔn bɔku ɔda wan dɛn bin de ala lawd lawd wan fɔ sho se dɛn gladi. 13 So di pipul dɛn nɔ bin ebul fɔ no udat de kray ɛn udat gladi, bikɔs di pipul dɛn bin so de ala lawd wan dat di wan dɛn we de fa fa say bin de yɛri.