Zɛkaraya
6 Dɔn a luk ɔp bak ɛn si 4 chariɔt dɛn de kam bitwin tu mawntin dɛn, ɛn di mawntin dɛn na bin kɔpa. 2 Di fɔs chariɔt gɛt rɛd ɔs dɛn, ɛn di sɛkɔn chariɔt gɛt blak ɔs dɛn. 3 Di tɔd chariɔt gɛt wayt ɔs dɛn, ɛn di nɔmba 4 chariɔt gɛt ɔs dɛn we gɛt dɔt dɔt ɛn ɔs dɛn we gɛt difrɛn kɔlɔ dɛn.
4 A aks di enjɛl we bin de tɔk to mi se: “Mi masta, wetin dɛn wan ya?”
5 Di enjɛl ansa mi se: “Dis na di 4 spirit dɛn na ɛvin we de go afta dɛn dɔn tinap bifo di Masta fɔ di wan ol wɔl. 6 Di chariɔt we gɛt blak ɔs dɛn de go na di land we de na di nɔt; di wayt ɔs dɛn de go na di land we de biɛn di si; ɛn di ɔs dɛn we gɛt dɔt dɔt de go na di land we de na di sawt. 7 Ɛn di ɔs dɛn we gɛt difrɛn kɔlɔ dɛn bin rili want fɔ go waka waka na di wɔl.” Dɔn i se: “Una go waka waka na di wɔl.” Ɛn dɛn bigin fɔ waka waka na di wɔl.
8 I kɔl mi ɛn se: “Luk, di wan dɛn we de go na di land we de na di nɔt dɔn mek Jiova nɔ vɛks igen pan di land we de na di nɔt.”
9 Jiova tɛl mi bak se: 10 “Tek wetin Ɛlday, Tobayja, ɛn Jideya briŋ kam frɔm di pipul dɛn na Babilɔn; ɛn da de de yu fɔ go na Josaya, we na Zɛfanaya in bɔypikin, in os wit dɛn man ya we kɔmɔt na Babilɔn. 11 Yu fɔ tek silva ɛn gold ɛn mek krawn* ɛn put am na Jɔshwa di ay prist in ed, we na Jɛɔzadak in bɔypikin. 12 Ɛn tɛl am se:
“‘Na dis Jiova we gɛt bɔku bɔku sojaman dɛn se: “Dis na di man we nem Plant we Jɔs Bɔs. I go bɔs na in yon ples, ɛn i go bil Jiova in tɛmpul. 13 Na in na di wan we go bil Jiova in tɛmpul, ɛn na in na di wan we go gɛt di ɔnɔ. I go sidɔm na in tron ɛn rul, ɛn i go bi prist bak na in tron. Ɛn i go du dɛn tu wok dɛn ya* fɔ lɛ pis de. 14 Ɛn dɛn go put di krawn* na Jiova in tɛmpul fɔ mɛmba wetin Ilɛm, Tobayja, Jideya, ɛn Zɛfanaya in bɔypikin, we na Ɛn, dɔn du. 15 Dɔn di wan dɛn we de fa go kam ɛn ɛp fɔ bil Jiova in tɛmpul.” Ɛn una go no se na Jiova we gɛt bɔku bɔku sojaman dɛn sɛn mi to una. Ɛn i go apin—if una lisin to Jiova una Gɔd.’”