Di Fɔs Renbo

WETIN na di fɔs tin we Noa du we in ɛn in famili kɔmɔt insay di ak? Na sakrifays i mek to Gɔd. Yu de si Noa na di pikchɔ we i de mek di sakrifays? Noa bin yuz animal dɛn fɔ mek dis sakrifays, fɔ tɛl Gɔd tɛnki fɔ we i sev in ɛn in famili we di ebi ren bin kam.

Yu tink se Jiova bin gladi fɔ di sakrifays? Yɛs, i bin gladi. Ɛn na dat mek i prɔmis se i nɔ go ɛva pwɛl di wɔl wit wata igen.

I nɔ tu te, ɔl di wata dray. Ɛn Noa ɛn in famili bigin fɔ liv nyu layf. Gɔd blɛs dɛn ɛn tɛl dɛn se: ‘Una bɔn bɔku pikin dɛn. Una fɔ bɔku te una ful-ɔp di wan ol wɔl.’

Bɔt leta, we pipul dɛn go yɛri bɔt di ebi ren, dɛn go fred se da kayn ren de go kam bak. So Gɔd mek sɔntin fɔ mɛmba pipul dɛn bɔt in prɔmis fɔ se, i nɔ go ɛva pwɛl di wɔl wit wata igen. Yu no wetin i mek? Na renbo i mek.

Bɔku tɛm, wi kin si renbo na di klawd afta ren dɔn kam ɛn di san bigin shayn. Renbo gɛt bɔku fayn fayn kɔla dɛn. Yu dɔn ɛva si renbo? Yu de si di wan we de na di pikchɔ?

Gɔd tɔk se: ‘A prɔmis se a nɔ go ɛva kil mɔtalman ɛn animal dɛn wit wata igen. A de put mi renbo na di klawd. Ɛn ɛnitɛm we di renbo kɔmɔt, a go si am ɛn mɛmba dis prɔmis we a mek.’

So ɛnitɛm we yu si renbo, wetin yu fɔ mɛmba? Yu fɔ mɛmba Gɔd in prɔmis fɔ se i nɔ go ɛva pwɛl di wɔl wit wata igen.