Di San Nɔ Go Dɔŋ

LUK Jɔshwa na di pikchɔ. I de tɔk se: ‘San, nɔ go dɔŋ!’ Ɛn di san nɔ go dɔŋ. I de midul di klawd fɔ wan ol de. Na Jiova mek dat apin! Bɔt lɛ wi si wetin mek Jɔshwa nɔ want lɛ di san go dɔŋ.

We di fayv bad kiŋ dɛn na Kenan kam fɔ fɛt di Gibyɔnayt dɛn, di Gibyɔnayt dɛn sɛn wan man fɔ go beg Jɔshwa fɔ kam ɛp dɛn. I tɛl Jɔshwa se: ‘Duya kam kwik fɔ kam sev wi! Ɔl di kiŋ dɛn na di kɔntri dɛn we de ɔp di il dɔn kam fɔ fɛt wi.’

Jɔshwa ɛn ɔl in fɛtman dɛn go na Gibyɔn wantɛm wantɛm. Dɛn waka ol nɛt. We dɛn rich de, di fayv kiŋ dɛn sojaman dɛn fred, so dɛn bigin rɔnawe. Dɔn Jiova mek ren we fiba smɔl smɔl ays blɔk bigin kam. Di sojaman dɛn we di ren kil bɔku pas di wan dɛn we Jɔshwa in fɛtman dɛn kil.

Jɔshwa si se i nɔ go te di san go go dɔŋ. Dis go mek di ples dak, ɛn bɔku pan dɛn fayv bad kiŋ dɛn sojaman dɛn go rɔnawe. So na dat mek Jɔshwa pre to Jiova, dɔn i tɔk se: ‘San, nɔ go dɔŋ!’ Ɛn we di san nɔ go dɔŋ, di Izrɛlayt dɛn win di fɛt.

Plɛnti ɔda bad kiŋ dɛn bin de na Kenan we nɔ lɛk Gɔd in pipul dɛn. Jɔshwa ɛn in fɛtman dɛn tek lɛk siks ia so fɔ win 31 kiŋ dɛn na Kenan. Afta dat, Jɔshwa sheb di land to di trayb dɛn we nɔ bin dɔn gɛt land yet.

We i te smɔl, Jɔshwa day. I bin ol 110 ia. We Jɔshwa ɛn in padi dɛn bin de, di pipul dɛn bin de du wetin Jiova want. Bɔt we dɛn gud man ya day, di pipul dɛn bigin fɔ du bad bad tin dɛn, ɛn dis kin mek bad tin apin to dɛn. Na da tɛm de dɛn kin want lɛ Gɔd ɛp dɛn.