Wetin A Go Du if Pɔsin De Mɔna Mi fɔ Du Mami ɛn Dadi Biznɛs?

WETIN YU GO DU?

Tink bɔt dis: Sera ɛn Jɔn dɔn de fɔ jɔs tu mɔnt, bɔt Sera de fil lɛk se i dɔn sabi Jɔn fɔ lɔng lɔng tɛm. Dɛn kin sɛn tɛks mɛsej to dɛnsɛf ɔltɛm, dɛn kin tɔk fɔ lɔng na di fon, ɛn we dɛn de tɔk, wan pɔsin kin no wetin in kɔmpin want fɔ se ɛn dɔn di tɔk na in mɔt! Bɔt naw, Jɔn nɔ jɔs want mek dɛn de tɔk to dɛnsɛf, i want sɔntin we pas dat.

Insay di las tu mɔnt, Jɔn ɛn Sera kin jɔs ol dɛn an ɛn kis fɔ shɔt tɛm. Sera nɔ want fɔ du ɛnitin we pas dat. Bɔt i nɔ want lɛ in ɛn Jɔn skata. Nɔbɔdi nɔ de we kin mek i fil se i fayn ɛn spɛshal, pas Jɔn. I kin tɛl insɛf se, ‘Apat frɔm dat, mi ɛn Jɔn, wi lɛk wisɛf . . .’

If yu dɔn big fɔ lɛ yu ɛn pɔsin de ɛn if na yu na bin Sera, wetin yu go du?

STƆP ƐN TINK!

If yu jɔs jomp kɔmɔt ɔp tik ɛn tray fɔ flay lɛk bɔd, yu go sɔfa fɔ dat. Na di sem tin go apin if yu pwɛl wan pan Gɔd in lɔ dɛn we de sho wi aw fɔ liv wi layf, lɛk di wan we se: “I nɔ gud fɔ mek una liv fri layf” ɔ du mami ɛn dadi biznɛs di we aw Gɔd nɔ want.—Lɛta Fɔ Ɛfisɔs 5:​3.

Wetin go apin we wi nɔ obe da lɔ de? Di Baybul se: “Ɛni ɔda tin we pɔsin de du we na sin nɔ go ambɔg in bɔdi lɛkɛ aw pɔsin we liv fri layf de ambɔg in yon bɔdi.” (Fɔs Lɛta Fɔ Kɔrint 6:​18) Wetin mek wi go se dis na tru?

Ripɔt dɔn sho se bɔku yɔŋ wan dɛn we dɔn du mami ɛn dadi biznɛs we dɛn nɔ mared dɔn sɔfa fɔ dat. Sɔm pan di tin dɛn we kin apin to dɛn na:

• PWƐL AT. Bɔku yɔŋ wan dɛn we dɔn du mami ɛn dadi biznɛs we dɛn nɔ mared dɔn tɔk se dɛn rigrɛt am.

• DƐN NƆ KIN BILIV DƐNSƐF IGEN. Afta we tu pipul dɛn dɔn du mami ɛn dadi biznɛs, dɛn kin bigin de wɔnda, ‘Udat bak dis pɔsin go dɔn du mami ɛn dadi biznɛs wit?’

• RIGRƐT. Bɔku titi dɛn kin rili want pɔsin we go protɛkt dɛn, nɔto pɔsin we go tek advantej pan dɛn. Ɛn bɔku bɔbɔ dɛn nɔ kin tu lɛk titi dɛn we dɛn kin dɔn du mami ɛn dadi biznɛs wit.

• Wan impɔtant tin we yu fɔ no: If yu du mami ɛn dadi biznɛs we yu nɔ mared, yu de mɔlɛs yusɛf, ɛn yu de lɔs sɔntin we rili gɛt valyu. (Lɛta Fɔ Rom 1:​24) Yu bɔdi tu impɔtant fɔ giwe!

Tray tranga wan nɔ fɔ “liv fri layf” ɔ du mami ɛn dadi biznɛs di we aw Gɔd nɔ want. (Lɛta Fɔ Ɛfisɔs 5:​3) Dɔn if yu mared wan de, yu go du mami ɛn dadi biznɛs. Ɛn yu nɔ go gɛt di prɔblɛm dɛn we pipul dɛn kin gɛt we dɛn du mami ɛn dadi biznɛs we dɛn nɔ mared. Yu go ɛnjɔy fɔ du mami ɛn dadi biznɛs, yu nɔ go wɔri, yu nɔ go rigrɛt, ɛn yu nɔ go fred.—Prɔvabs 7:​22, 23; Fɔs Lɛta Fɔ Kɔrint 7:3.

WETIN YU TINK?

• Yu tink se ɛnibɔdi we rili lɛk yu go want mek bad tin apin to yu?

• Yu tink se ɛnibɔdi we rili lɛk yu go tɛmt yu fɔ pwɛl yu padi biznɛs wit Gɔd?—Di Ibru Pipul Dɛn 13:​4.