Jizɔs Mɛn Pipul dɛn di Sabat De

Di Faresi dɛn bin et Jizɔs, ɛn dɛn bin de fɛn rizin fɔ arɛst am. Dɛn se Jizɔs nɔ fɔ mɛn sikman dɛn di Sabat de. Jizɔs si wan blaynman de beg na strit wan Sabat de. I tɛl in disaypul dɛn se: ‘Una kam si aw Gɔd in pawa go ɛp dis man.’ Jizɔs miks in pit wit dɔti ɛn rɔb am na di man in yay. Jizɔs tɛl di man se: ‘Go was yu yay na di wata na Siloam.’ Di man du dat, ɛn fɔ di fɔs tɛm na in layf, i ebul fɔ si.

Pipul dɛn sɔprayz. Dɛn aks se: ‘Na di man dis we bin de sidɔm ɛn beg, ɔ na pɔsin we fiba am?’ Di man tɛl dɛn se: ‘Na mi bin blayn frɔm we a bɔn!’ Di pipul dɛn aks am se: ‘Wetin mek yu nɔ blayn igen?’ We i tɛl dɛn wetin apin, dɛn kɛr am go to di Faresi dɛn.

Di man tɛl di Faresi dɛn se: ‘Jizɔs rɔb dɔti na mi yay, ɛn i tɛl mi fɔ go was am. A du am ɛn naw, a de si.’ Di Faresi dɛn tɔk se: ‘If Jizɔs de mɛn pɔsin di Sabat de, dat min se in pawa nɔ kɔmɔt frɔm Gɔd.’ Bɔt ɔda pipul dɛn tɔk se: ‘If Jizɔs in pawa nɔ kɔmɔt frɔm Gɔd, i nɔ go ebul fɔ mɛn pɔsin.’

Di Faresi dɛn kɔl di man in mama ɛn papa ɛn aks dɛn se: ‘Aw una pikin ebul fɔ si naw?’ In mama ɛn papa fred bikɔs di Faresi dɛn bin dɔn tɔk se dɛn go drɛb ɛnibɔdi we gɛt fet pan Jizɔs kɔmɔt na di sinagɔg. So dɛn tɔk se: ‘Wi nɔ no. Una aks am.’ Di Faresi dɛn aks di man bɔku kwɛstyɔn dɛn te i tɔk se: ‘A dɔn tɛl una ɔl wetin a no. Wetin mek una de kɔntinyu fɔ aks mi?’ Di Faresi dɛn vɛks, ɛn dɛn trowe am na do.

Jizɔs go fɛn di man, ɛn i aks am se: ‘Yu gɛt fet pan di Mɛsaya?’ Di man tɔk se: ‘A go put fet pan am if a sabi am.’ Jizɔs tɛl am se: ‘Na mi na di Mɛsaya.’ Na fayn tin Jizɔs du? I nɔ jɔs mɛn di man, bɔt i ɛp am bak fɔ gɛt fet.