Jiova Witnɛs dɛn gɛt uman minista dɛn?

Yɛs, bɔku Jiova Witnɛs uman dɛn de prich ɔlsay na di wɔl. Dɛn de prich di gud nyuz bɔt Gɔd in Kiŋdɔm. Wan prɔfɛt bin rayt na Sam 68:​11 (NWT) se: “Di uman dɛn we de prich di gud nyuz na bɔku amiman dɛn.”

Bɔt wi nɔ fɔ mistek di prichin wok we Jiova Witnɛs uman dɛn de du wit di kayn wok we sɔm biguman dɛn de du na ɔda rilijɔn dɛn. Difrɛns de bitwin Jiova Witnɛs uman dɛn we de prich ɛn uman dɛn we de prich na ɔda rilijɔn. Aw dɛn difrɛn?

Di wan dɛn we dɛn de prich to difrɛn. Di biguman dɛn na di chɔch kin gɛt pozishɔn insay dɛn chɔch ɛn di men pipul dɛn we dɛn kin prich to na pipul dɛn we de pat ɔf dɛn kɔngrigeshɔn. Fɔ Jiova Witnɛs uman dɛn, di men pipul dɛn we dɛn kin prich to na pipul dɛn we nɔ de insay di kɔngrigeshɔn, dat na pipul dɛn we dɛn kin mit na pɔblik ples dɛn, na dɛn os dɛn, ɛn ɔda say dɛn.

Wan ɔda we we Jiova Witnɛs uman dɛn difrɛn frɔm uman dɛn na ɔda rilijɔn na di tin dɛn we dɛn de du na di kɔngrigeshɔn. Uman dɛn na ɔda rilijɔn kin tek di lid na dɛn chɔch ɛn dɛn kin tɛl dɛn mɛmba dɛn wetin fɔ du akɔdin to wetin dɛn biliv na dɛn rilijɔn. Bɔt Jiova Witnɛs uman dɛn nɔ de tich na di kɔngrigeshɔn we baptayz man dɛn de. Na man dɛn nɔmɔ, dɛn de pik as ticha dɛn na di kɔngrigeshɔn.​—1 Timoti 3:​2; Jems 3:​1.

Di Baybul sho se na man dɛn nɔmɔ fɔ tek di lid na di kɔngrigeshɔn. Notis di patan we di apɔsul Pɔl bin sɛt we i rayt to Taytɔs we na in kɔmpin ovasia. I bin rayt se: “A bin lɛf yu na Krit fɔ mek yu . . . pik ɛlda dɛn na difrɛn siti dɛn.” Pɔl bin tɔk bak se ɛni man we i pik fɔ bi pɔsin we “dɛn nɔ de fɛn fɔlt pan, [ɛn] we gɛt wan wɛf.” (Taytɔs 1:​5, 6) Pɔl bin tɛl Timoti fɔ du di sem tin insay wan lɛta we i bin rayt to am fɔ se: “If man de tray fɔ bi ovasia, na fayn wok i want fɔ du so. Ovasia fɔ bi pɔsin we dɛn nɔ de fɛn fɔlt pan, na wan wɛf i fɔ gɛt, . . . i fɔ kwalifay fɔ tich.”​—1 Timoti 3:​1, 2.

Wetin mek na man dɛn nɔmɔ de tek di lid na di kɔngrigeshɔn? Pɔl bin se: “A nɔ gi uman rayt fɔ tich ɔ fɔ de oba man; i nɔ fɔ tɔk. Na Adam fɔs Gɔd mek, dɔn i mek Iv.” (1 Timoti 2:​12, 13) Bikɔs na man fɔs Gɔd mek bifo uman, dat de sho wetin mek Gɔd gi dɛn di wok fɔ tich ɛn fɔ tek di lid.

Jiova Witnɛs dɛn de fala di ɛgzampul we dɛn Lida, Jizɔs Krays sɛt. Di disaypul Lyuk bin rayt bɔt di we aw Jizɔs bin de du di prichin wok. I bin rayt se: “I go na difrɛn siti dɛn ɛn vilej dɛn fɔ prich di gud nyuz bɔt Gɔd in Kiŋdɔm.” Leta, Jizɔs bin sɛn in disaypul dɛn fɔ du di sem wok: “Dɛn go na difrɛn vilej dɛn, de prich di gud nyuz.”​—Lyuk 8:​1; 9:​2-6.

Tide, man ɛn uman dɛn we na Jiova Witnɛs dɛn de du wetin Jizɔs bin tɔk we i se: “Dɛn go prich dis gud nyuz bɔt di Kiŋdɔm na di wan ol wɔl so dat ɔl di neshɔn dɛn go gɛt chans fɔ yɛri, dɔn di ɛnd go kam.”​—Matyu 24:​14.