DI BAYBUL IN ANSA TO SƆM KWƐSTYƆN DƐN

Wetin mek wi fɔ pre?

Jiova Gɔd want lɛ wi fil fri fɔ tɔk to am ɔltɛm bɔt di tin dɛn we de mɔna wi. (Lyuk 18:1-7) Gɔd de lisin we wi pre to am bikɔs i bisin bɔt wi. Ɛn na in dɔn tɛl wi fɔ pre to am. So yu nɔ tink se i go fayn fɔ lɛ wi de du dat?—Rid Lɛta Fɔ Filipay 4:6.

Prea nɔ de nɔmɔ fɔ lɛ wi de beg Gɔd fɔ ɛp wi, bɔt i de ɛp wi fɔ kam nia Gɔd mɔ ɛn mɔ. (Sam 8:3, 4) We wi de tɛl Gɔd ɔltɛm bɔt aw wi de fil, wi padi biznɛs wit am de tayt mɔ ɛn mɔ.—Rid Jems 4:8.

Aw wi fɔ pre?

We wi de pre, Gɔd nɔ want lɛ wi yuz big big wɔd dɛn, i nɔ want lɛ wi kram prea dɛn, ɛn i nɔ want lɛ wi tɔk di sem tin ɔltɛm. Gɔd nɔ tɛl wi ɛni spɛshal we aw wi fɔ mek wi an ɔ wi bɔdi we wi de pre to am. Jiova want lɛ wi pre to am frɔm wi at. (Matyu 6:7) Fɔ ɛgzampul, Ana we bin de na Izrɛl, bin pre to Gɔd bɔt wan prɔblɛm we bin de mɔna am. Leta we Gɔd ansa in prea, i bin gladi, ɛn i pre bak to Gɔd wit ɔl in at fɔ tɛl am tɛnki.—Rid Fɔs Samiɛl 1:10, 12, 13, 26, 27; 2:1.

Na big big ɔnɔ wi gɛt fɔ de pre to Jiova! Wi kin tɛl Gɔd bɔt di tin dɛn we de mɔna wi. Wi kin prez am ɛn tɛl am tɛnki fɔ di tin dɛn we i dɔn du. Rili, i go fayn lɛ wi de pre to Gɔd ɔltɛm. —Rid Sam 145:14-16.