Bɔku Pipul Dɛn Go Sev We Di Wɔl Dɔn Yusɛf Go Ebul Sev

We di Baybul de tɔk bɔt di wɔl in dɔn wan, i tɔk se: “Big big trɔbul gɛt fɔ kam we nɔ wande bi yet frɔm we di wɔl bigin te naw . . . Infakt, if dɛn nɔ ridyus di tɛm, no mɔtalman nɔ go sev.” (Matyu 24:21, 22) Bɔt Gɔd prɔmis wi se bɔku pipul dɛn go sev. “Di wɔl go dɔn jisnɔ . . . , bɔt di wan we de du wetin Gɔd want go de sote go.”—Jɔn In Fɔs Lɛta 2:17.

If yu want fɔ sev we dis wɔl de dɔn ɛn “de sote go,” wetin yu fɔ du? Yu tink se yu fɔ bigin kip bɔku tin dɛn we yu go nid ɔ du ɔda tin dɛn? Nɔ. Di Baybul nɔ ɛnkɔrej wi fɔ du dat, bifo dat, i se: “Ɛnti na so ɔl dɛn tin ya gɛt fɔ apin, una fɔ de tink bɔt uskayn pɔsin una fɔ bi ɛn aw una fɔ biev lɛk pipul dɛn we oli ɛn du tin dɛn we de sho se una de wɔship Gɔd, as una de wet ɛn kɔntinyu fɔ tink bɔt Jiova in de.” (Pita In Sɛkɔn Lɛta 3:10-12) Di skripchɔ dɛn we de nia dɛn vas ya sho se “ɔl dɛn tin ya” we nɔ gɛt fɔ de igen na di gɔvmɛnt dɛn we de rul na dis kɔrɔpt wɔl ɛn di wan dɛn we de sɔpɔt dɛn ɛn we nɔ want lɛ Gɔd rul dɛn. So, wi dɔn si klia wan se ilɛksɛf wi kip bɔku bɔku tin dɛn, nɔto dat go mek wi sev we di wɔl go dɔn.

Di tin we go mek wi sev na we wi de wɔship Jiova Gɔd wit ɔl wi at ɛn lan bɔt di tin dɛn we i want lɛ wi du we go mek i gladi. (Zɛfanaya 2:3) Wi nɔ want fɔ fala bɔku pipul dɛn tide we nɔ biliv se wi de liv na di tɛm we di wɔl de kam dɔn. Bifo dat, wi fɔ “kɔntinyu fɔ tink bɔt Jiova in de.” Jiova Witnɛs dɛn go yuz di Baybul fɔ sho yu aw yu go sev we da de de go kam