Mek Am Yu Abit Nɔ fɔ De Let
1. Wetin wi go lan frɔm Jiova we i kam pan tɛm?
1 Jiova nɔ de let. Fɔ ɛgzampul, i de ‘ɛp in savant dɛn di rayt tɛm.’ (Ibru 4:16) I de gi wi di tin dɛn we wi nid fɔ lan bɔt am “we di rayt tɛm rich.” (Mat. 24:45) Wi fɔ biliv tranga wan se Jiova in de go kam di “rayt tɛm.” (Aba. 2:3) Wi rili de bɛnifit we Jiova nɔ de westɛm fɔ du ɛnitin! (Sam 70:5) Bikɔs wi nɔ pafɛkt ɛn wi gɛt bɔku tin dɛn fɔ du, dat kin mek i nɔ kin izi fɔ du sɔntin di rayt tɛm. Wetin mek i fayn fɔ mek am wi abit nɔ fɔ let?
2. Wetin mek we wi nɔ let, de ɔnɔ Jiova?
2 Tide i nɔ izi atɔl fɔ mek pipul dɛn nɔ let pan ɛnitin bikɔs bɔku pipul dɛn jɔs de tink bɔt dɛnsɛf nɔmɔ ɛn dɛn nɔ de kɔntrol dɛnsɛf. (2 Tim. 3:1-3) We ɔda pipul dɛn de si se Kristian dɛn nɔ de let fɔ go wok, du sɔntin we dɛn ɛn ɔda pɔsin bin dɔn arenj fɔ du, ɛn fɔ go na mitin dɛn, dat kin ɔnɔ Jiova. (1 Pit. 2:12) Tink bɔt dis: Wi nɔ kin let fɔ go wok, bɔt wi kin let we i kam pan Gɔd biznɛs? Fɔ kam mitin kwik min se wi fɔ de fɔ di fɔs siŋ ɛn prea. Dat de sho se wi rili want fɔ falamakata wi Papa na ɛvin fɔ du ɔltin di rayt we.—1 Kɔr. 14:33, 40.
3. Aw wi de sho se wi de tink bɔt ɔda pipul dɛn we wi nɔ let?
3 We wi nɔ let de sho se wi de tink bɔt ɔda pipul dɛn. (Fil. 2:3, 4) Fɔ ɛgzampul, we wi go kwik na mitin ɛn ivin na mitin fɔ fil savis, wi nɔ go ambɔg wi kɔmpin Kristian dɛn. Bɔt if wi de let ɔltɛm, i go tan lɛk wi de tɛl wi brɔda dɛn se wi gɛt bɛtɛ tin fɔ du wit tɛm pas dɛn. We wi nɔ de let de sho se pɔsin kin abop pan wi ɛn wi nɔ de westɛm fɔ du sɔntin. Pipul dɛn kin lɛk we wi gɛt dɛn kwaliti ya.
4. Wetin wi fɔ du if ɔltɛm wi de let?
4 If ɔltɛm wi de let, i go fayn mek wi tink gud wan fɔ no wetin mek dat kin apin. Plan di tɛm we yu go want fɔ du ɔl di tin dɛn we yu gɛt fɔ du. (Ɛkli. 3:1; Fil. 1:10) Pre to Jiova fɔ ɛp yu. (1 Jɔn 5:14) Wan we aw wi go sho se wi lɛk Gɔd ɛn wi kɔmpin mɔtalman, na we wi nɔ de let.—Mat. 22:37-39.