Kwɛstyɔn Bɔks

◼ Wetin Pikin dɛn fɔ Lan we Go Ɛp dɛn fɔ Go Bifo Pan Gɔd in Wok?

Mama ɛn papa dɛn kin du ɔl wetin dɛn ebul fɔ mek dɛn tich dɛn pikin dɛn bɔt Jiova, ɛn “fɔ gi dɛn Kristiɛn trenin.” (Ɛfi. 6:4) Fɔ ɛgzampul, dɛn dɔn si se di pikin dɛn kin bɛnifit we dɛn ɔl de du di deli tɛks ɛvri mɔnin. We famili dɛn de du dɛn famili wɔship ɔ ɛni ɔda tɛm, dɛn kin wach wi vidio dɛn ɛn tɔk bɔt am we dɛn dɔn ɔ tɔk bɔt sɔntin we de na Young People Ask. Dɛn kin rid stori dɛn na di Baybul ɛn mek lɛk di wan dɛn we dɛn rid bɔt na di stori. Dɛn kin ivin lan aw fɔ prich. Bɔt fɔ mek pikin “go bifo ɛn lan dɛn tin we bigman fɔ lan bɔt Krays,” mama ɛn papa dɛn fɔ tich dɛn fɔ no mɔ.—Ibru 6:1.

Tink bɔt wetin wi kin tich pipul dɛn na fil savis. Di fɔs tɛm we wi go mit pɔsin ɔ we wi go bak to am, wi kin tray fɔ yuz di buk we nem Wetin Rili Di Baybul De Tich? fɔ stat Baybul stɔdi wit am. We wi dɔn fɔ stɔdi pɔsin dis buk, wi kin yuz ɔda wan we nem Kɔntinyu fɔ Du Wetin Go Mek Gɔd Lɛk Yu. Wetin du? Di Baybul Tich buk de sho di pɔsin di fɔs tin dɛn we i nid fɔ no bɔt di Baybul. Di Gɔd Lɛk yu buk de ɛp pipul dɛn fɔ du wetin di Baybul se pan ɛnitin we dɛn de du. We pɔsin stɔdi dɛn tu buk ya, dat kin ɛp di pɔsin fɔ “fasin” pan Krays ɛn mek am di ‘fawndeshɔn na in layf.’ (Kɔl. 2:6, 7) Yu nɔ tink se dɛn tu buk ya go bɛnifit wi pikin dɛn? Dɛn fɔ no bɔt di day we Jizɔs kam day fɔ mɔtalman, di Kiŋdɔm, ɛn wetin de apin to pɔsin we i day. Pikin dɛn fɔ no bak wetin mek Gɔd de alaw wi fɔ sɔfa ɛn dɛn fɔ no di tin dɛn we go apin we di wɔl want dɔn. Dɛn fɔ biliv gud wan se na Jiova Witnɛs dɛn de tich di tru. Dɛn yɔŋ wan dɛn sɛf nid fɔ ɔndastand wetin di Baybul se ɛn dɛn fɔ lan aw fɔ no “wetin gud ɛn wetin bad.” (Ibru 5:14) Mama ɛn papa fɔ tink bɔt dɛn pikin dɛn ej ɛn wetin dɛn go ebul fɔ ɔndastand. Bɔt sɔm pikin dɛn de we kin ebul ɔndastand dip tin dɛn na di Baybul.—Lyuk 2:42, 46, 47.