Ɔgɔst fɔ Bi Mɔnt we Wi fɔ Mɛmba!

1. As Gɔd in Kiŋdɔm de kam 100 ia, us spɛshal prichin go de ɔlsay na di wɔl?

¹ We Gɔd in Kiŋdɔm de kam 100 ia, i go fayn mek wi ɔnɔ Jiova bay we wi jɔyn fɔ du wan spɛshal prichin. Insay Ɔgɔst, wi go sheb wan nyu trakt ɔlsay na di wɔl. Di trakt in taytul na “Usay Wi Go Fɛn di Ansa to Sɔm Impɔtant Kwɛstyɔn dɛn we Wi Kin Aks?“ Dis trakt go ɛnkɔrej di wan dɛn we go rid am fɔ luk insay di Baybul fɔ ansa dɛn ɛn i go ɛksplen aw jw.org go ɛp dɛn.

2. Aw wi go jɔyn fɔ ‘ala lawd wan fɔ prez Jiova’ insay Ɔgɔst?

² Ala Lawd Wan fɔ Prez Jiova: Fɔ mek pɔblisha dɛn du mɔ na di prichin wok, dɛn dɔn arenj wan spɛshal we fɔ du am. Di wan dɛn we dɔn baptayz ɛn we want fɔ ɔgzilari payɔnia kin prich fɔ 30 awa insay Ɔgɔst. Ɛnti Ɔgɔst gɛt fayv Frayde, Satide, ɛn Sɔnde, dat go mek bɔku pɔblisha dɛn we de wok ɔ we de go skul, go ebul fɔ ɔgzilari payɔnia. If yu gɛt Baybul stɔdi ɔ pikin we dɔn rich fɔ bigin prich, na fɔ tɛl di kɔdinetɔ fɔ di ɛlda dɛn wantɛm wantɛm. I go fayn fɔ si dɛn wan ya jɔyn wi fɔ prich we dɛn go dɔn bi pɔblisha insay Ɔgɔst! Pan ɔl we bɔku rɛgyula payɔnia dɛn kin tek ɔlide insay Ɔgɔst bikɔs dɛn dɔn gɛt di awa we dɛn fɔ prich insay di ia, i go fayn fɔ mek dɛn stil mek chans fɔ jɔyn pan dis spɛshal prichin wok. Na naw famili dɛn fɔ tɔk bɔt aw dɛn go ‘ala lawd wan fɔ prez Jiova’ insay Ɔgɔst.—Ɛzra 3:11; Prɔv. 15:22.

3. Us op wi gɛt fɔ dis spɛshal prichin wok?

³ Pan ɔl we wi bin dɔn de tek pat pan spɛshal prichin wok trade, wi op se wi go rili mɛmba dis wan. Wi go ebul du mɔ awa, gɛt mɔ pɔblisha dɛn, ɛn mɔ ɔgzilari payɔnia insay Ɔgɔst? As di 2014 savis ia de dɔn, wi de prea mek Jiova blɛs di wok we in pipul dɛn de du ɔlsay na di wɔl fɔ mek Ɔgɔst bi di mɔnt we wi go prich pas ɔl di ɔda tɛm dɛn we dɔn pas!—Mat. 24:14.