Prich di Gud Nyus Ɔlsay
1 Fɔstɛm Kristian dɛn bin prich di gud nyus ɔlsay. Dɛn bin so gɛt zil dat, dɛn bin dɔn prich ‘di Gud Nyuz to ɔlman na [di] wɔl,’ 30 ia afta Jizɔs dɔn gɛt layf bak.—Kɔl. 1:23.
2 Na di sem tin Jiova in pipul dɛn de du tide, dat na fɔ prich di gud nyus to ɔlman we dɛn ebul fɔ tɔk to. Wetin go ɛp wi fɔ du dis? Bɔku pipul dɛn kin wok ɔltɛm ɛn i nɔ kin izi fɔ mit dɛn na os we wi go prich. We dɛn nɔ go wok, i go bi se dɛn travul, dɛn go bay bay, ɔ dɛn go ɛnjɔy dɛnsɛf. Pan ɔl dɛn pipul ya, aw wi go mit di wan dɛn we rili want fɔ no mɔ bɔt Gɔd in Kiŋdɔm?—Mat. 10:11.
3 Bɔku pɔblisha dɛn de tray tranga wan fɔ prich na say usay bɔku pipul dɛn kin de, ɛn ɛnisay dɛn mit pɔsin. Fɔstɛm, dɛn pɔblisha ya bin de fred bikɔs na os to os mɔ dɛn dɔn yus fɔ prich. Bɔt aw dɛn fil naw?
4 Wan brɔda we gɛt ɛkspiriɛns fɔ prich bin tɔk se, “I dɔn mek a gladi mɔ fɔ prich!” Wan ɔda brɔda bin tɔk se: “I dɔn ɛp mi fɔ pe mɔ atɛnshɔn to mi prichin wok.” Wan payɔnia tɔk se: “I kin ɛp mi mɔ wit aw a de wɔship Gɔd, aw a de tink, . . . ɛn aw pipul dɛn de si mi. Dis dɔn ɛp mi fɔ du mɔ.” Wan pɔblisha bin si se i ebul tɔk to bɔku pipul dɛn we nɔ wande tɔk to Jiova Witnɛs dɛn. Yɔŋ pipul dɛnsɛf dɔn de ɛnjɔy fɔ du dis wok. Wan yɔŋ man bin tɔk se: “A de ɛnjɔy am bikɔs a ebul tɔk to bɔku pipul dɛn.” Wan ɔda wan bin se: “Naw a kin ebul gi bɔku buk ɛn magazin dɛn pas aw a bin de gi trade!” Ɔl dis de bi na eria dɛn we wi kin dɔn prich bɔku tɛm.
5 Fɔ Prich na Strit: We wi kin go na eria dɛn we pipul dɛn nɔ de, wi kin wɔnda ‘Usay ɔl di pipul dɛn dɔn go?’ I go bi se sɔm dɔn kɔmɔt fɔ go bay bay ɔ fɔ go du ɔda tin. Yu dɔn tray fɔ prich to dɛn pipul ya na strit? If wi du am fayn, dis kayn we fɔ prich kin mek wi mit bɔku pipul dɛn. Bifo wi tinap wan ples wit di magazin dɛn, i bɛtɛ lɛ wi go mit pipul dɛn ɛn tray fɔ tɔk to dɛn. I nɔ min se pas yu tɔk to ɔlman we de pas. Tɔk to di wan dɛn we nɔ de rɔsh lɛk di wan dɛn we jɔs de aks prayz, di wan dɛn we sidɔm na motoka, ɔ di wan dɛn we de wet transpɔt. Fɔs, na fɔ grit dɛn fayn ɛn wet mek dɛn ansa yu. If di pɔsin rɛdi fɔ tɔk to yu, aks am wetin i tink bɔt sɔntin we yu tink se i go want fɔ no mɔ bɔt.
6 Wan travlin ovasia bin kɔl siks pɔblisha dɛn fɔ mek dɛn jɔyn i ɛn in wɛf fɔ prich na strit. I bin tɔk se: “Wi bin ɛnjɔy fɔ prich da mɔni de. I nɔ tan lɛk we wi kin go os to os ɛn wi nɔ mit pipul dɛn. Wi bin gi eti magazin dɛn ɛn bɔku trakt dɛn. Wi bin ɛnjɔy fayn tɔk wit pipul dɛn. Wan pɔblisha we na in fɔs tɛm fɔ prich na strit bin tɔk se: ‘I dɔn te we a de na di trut, a nɔ bin no se a de mis sɔntin!’ Te di wik de dɔn, wi bin dɔn yuz ɔl di magazin dɛn we bin de na di kɔngrigeshɔn.”
7 We di sem travlin ovasia go na di ɔda kɔngrigeshɔn, i yɛri se sɔm pɔblisha dɛn go prich na strit wan ali mɔnin, bɔt dɛn nɔ bin ebul tɔk to bɔku pipul dɛn. Na tu pipul dɛn nɔmɔ wan sista bin ebul fɔ tɔk to frɔm we dɛn bigin prich. Ɔl di ɔda wan dɛn bin de rɔsh fɔ go wok. Di travlin ovasia bin tɛl dɛn fɔ go na di sem strit leta na mɔnin. Dɛn du am ɛn dɛn de de te aftanun. Da sista we na tu pipul dɛn nɔmɔ i bin ebul tɔk to ali mɔnin bin ebul fɔ tɔk to bɔku pipul dɛn. I bin ebul fɔ gi 31 magazin dɛn, 15 smɔl buk dɛn, ɛn i bin rayt sɛvin pipul dɛn nem ɛn adrɛs ɛn stat tu Baybul stɔdi dɛn. Ɔda pɔblisha dɛn we jɔyn di grup dɛnsɛf bin ebul tɔk to bɔku pipul dɛn.
8 We yu mit pɔsin we want fɔ no mɔ, tray fɔ rayt in nem, in adrɛs, ɛn in fon nɔmba. Bifo yu aks di pɔsin wantɛm wantɛm bɔt in adrɛs ɛn fon nɔmba, yu kin se: “A gladi we a ebul tɔk to yu. Yu go want lɛ wi kɔntinyu dis tɔk ɔda tɛm?” Ɔ yu kin aks am se: “We de fɔ lɛ wi tɔk mɔ na yu os?” Bɔku pipul dɛn we dɛn prich to na strit dɔn gri fɔ mek dɛn go bak to dɛn fɔ lan mɔ. Mek shɔ se yu gɛt bɔku inviteshɔn dɛn fɔ gi to pipul dɛn fɔ kam wi mitin.
9 If yu tɔk to pɔsin we want fɔ no mɔ, bɔt i de na eria usay ɔda kɔngrigeshɔn fɔ prich, na fɔ tɛl di brɔda dɛn we de na da kɔngrigeshɔn de wantɛm so dat dɛn go go to di pɔsin. Yu tink se fɔ prich na strit na fayn we fɔ mek pipul dɛn yɛri di gud nyus na yu eria? If dis kayn we fɔ prich fayn na yu eria, na fɔ rid di atikul insay di Julay 1994 Wi Kiŋdom Ministri we se, “Finding Interested Ones by Means of Effective Street Witnessing.” I fayn fɔ arenj fɔ prich na strit, tɛm we yu go ebul fɔ prich to bɔku pipul dɛn.
10 Fɔ Prich na Transpɔt: Wan mɔnin, sɔm payɔnia dɛn disayd fɔ prich to pipul dɛn we de wet fɔ transpɔt nia wan kɔlɛj. Pan ɔl we dɛn bin gladi fɔ tɔk to dɛn, wan prɔblɛm bin de. Wetin na di prɔblɛm? We di bɔs kam, dɛn nɔ go ebul fɔ kɔntinyu di tɔk wit dɛn pipul ya. Di payɔnia dɛn disayd fɔ go wit di bɔs so dat dɛn go kɔntinyu fɔ prich to di pipul dɛn we de insay di bɔs. We dɛn rich na di say we di bɔs de stɔp, dɛn tɔn bak wit di bɔs ɛn kɔntinyu fɔ prich. We dɛn dɔn go ɛn kam wit di bɔs bɔku tɛm, dɛn kɔnt wetin dɛn dɔn ebul du: Dɛn gi pas 200 magazin dɛn ɛn dɛn stat siks Baybul stɔdi dɛn. Sɔm pipul dɛn gi dɛn adrɛs ɛn dɛn fon nɔmba fɔ lɛ di payɔnia dɛn go fɛn dɛn bak. Di ɔda wik, di payɔnia dɛn go bak na di say we di bɔs kin kam ɛn du di sem tin. Dɛn bin ebul gi 164 magazin dɛn ɛn stat wan Baybul stɔdi bak. We di bɔs stɔp wan say, wan pasenja kam insay ɛn sidɔm na di wangren sit we bin dɔn lɛf—nia wan payɔnia. I luk di brɔda nain i smayl ɛn tɔk se: “A no, yu gɛt Wachtawa fɔ mi.”
11 Bɔku pɔblisha dɛn kin prich fayn we dɛn de travul wit bɔs, tren, ɔ plen. Aw yu go bigin prich to di pɔsin we sidɔm nia yu? Wan pɔblisha we ol 12 ia bigin rid wan Awake! we i de insay bɔs fɔ mek di titi we sidɔm nia am aks am kwɛstyɔn bɔt wetin i de rid. Ɛn na so i bi. Di titi aks am wetin i de rid. Di pɔblisha ansa am se i de rid bɔt aw fɔ sɔlv di prɔblɛm dɛn we yɔŋ pipul dɛn kin gɛt. I tɛl am bak se wetin de insay di atikul dɔn rili ɛp am ɛn i go ɛp di titi sɛf. I bin gladi fɔ tek di magazin dɛn. Tu ɔda yɔŋ pipul dɛn bin yɛri wetin dɛn de tɔk ɛn dɛnsɛf bin aks fɔ magazin dɛn. Dis mek di drayva pak di bɔs ɛn aks wetin mek dɛn want no mɔ bɔt di magazin dɛn. We dɛn tɛl am, i aks mek dɛn gi am in yon. Ɔl dis nɔ fɔ dɔn apin if dis yɔŋ pɔblisha nɔ bin gɛt bɔku magazin dɛn fɔ gi ɔl di wan dɛn we bin want fɔ no mɔ!
12 Fɔ Prich na Pak ɛn Say dɛn we Dɛn Kin Pak Motoka: Fɔ prich na pak ɛn say dɛn usay dɛn kin pak motoka dɛn na fayn we fɔ mit bɔku pipul dɛn fɔ prich to. Yu dɔn ɛva tray fɔ prich na di say usay dɛn big shɔp kin mek fɔ pak motoka? I fayn fɔ tek smɔl tɛm fɔ wach di eria gud wan. Luk fɔ pɔsin we nɔ de rɔsh, ɔ pɔsin we de wet insay motoka we pak ɛn tray fɔ bigin tɔk to am. If di tɔk kɔntinyu, na fɔ bigin tɔk Gɔd in Kiŋdɔm to di pɔsin. Tray fɔ prich yu wan, bɔt prich na say we ɔda pɔblisha go de si yu. Nɔ ol big big bag ɔ nɔ du sɔntin we go mek ɔlman bigin wach yu. Na fɔ tek tɛm. I go fayn fɔ spɛn smɔl tɛm na wan say we dɛn kin pak motoka, dɔn muf go ɔdasay. If pɔsin nɔ want fɔ tɔk wit yu, na fɔ lɛf am saful ɛn go luk fɔ ɔda pɔsin fɔ tɔk to. Wan brɔda bin dɔn prich dis kayn we ɛn i bin gi 90 magazin dɛn insay wan mɔnt.
13 Sɔm kin go na pak fɔ go ple gem, fɔ spɛn tɛm wit dɛn pikin dɛn ɔ sɔm kin go de fɔ jɔs go sidɔm. Fɔ lɛ yu nɔ ambɔg wetin dɛn go fɔ go du, tek tɛm wach fɔ chans fɔ prich to pɔsin. Wan brɔda bin bigin tɔk wit di wan we de wach di pak ɛn i kam no se dis man bin bisin mɔ bɔt drɔgs ɛn in pikin dɛn tumara bambay. Dis man bigin stɔdi ɛn na di pak de dɛn bin de stɔdi am.
14 Fɔ Prich na Dɛn Big Shɔp Dɛn: Na di eria we sɔm kɔngrigeshɔn dɛn fɔ prich, dɛn gɛt say dɛn de we na biznɛs nɔmɔ pipul dɛn kin go du de. Di brɔda we de arenj aw di kɔngrigeshɔn fɔ prich, fɔ mek spɛshal map dɛn fɔ dɛn ples ya. If os dɛn de na dɛn biznɛs ples ya, dɛn fɔ rayt am klia wan na di map se dɛn nɔ fɔ prich de di tɛm we dɛn de prich os to os. Na ɔda eria dɛn we di kɔngrigeshɔn fɔ prich, if say dɛn de we pipul dɛn kin du biznɛs, dɛn fɔ prich de we dɛn de prich na di os dɛn. Di ɛlda dɛn fɔ kɔl sɔm pɔblisha dɛn fɔ prich na dɛn ples ya we pipul dɛn kin du biznɛs, fas fas so dat dɛn nɔ go fɔgɛt dɛn.
15 Fɔ ‘mek yu nɔ fred’ we una de prich na say we na biznɛs nɔmɔ dɛn de du de, i go fayn fɔ bigin prich na dɛn smɔl shɔp dɛn fɔs. Afta sɔm tɛm yu go gɛt maynd fɔ prich na dɛn big shɔp dɛn. (1 Tɛs. 2:2) We yu de prich na dɛn kayn ples ya, i go fayn fɔ drɛs lɛk se yu de go mitin na Kiŋdɔm Ɔl. If we de, na fɔ go insay di shɔp we pɔsin nɔ de wet fɔ mek dɛn sɛl gi am. Aks mek dɛn sho yu di wan we de oba di shɔp ɛn tɔk to am. Na fɔ tek tɛm tɔk ɛn nɔ te. I nɔ min se yu fɔ tɔk sɔri sɔri wan. Bɔku biznɛs ples dɛn lɛk dɛn kɔstɔma dɛn ɛn dɛn no se na dɛn wok fɔ ɛp dɛn.
16 Afta yu dɔn grit di wan we de sɛl na di shɔp, yu kin se: “Pipul dɛn we de du biznɛs kin so bizi dat i nɔ kin izi fɔ mit dɛn na os. Na dat mek wi kam to yu na shɔp so dat wi go lɛf gi yu wan fayn atikul fɔ mek yu rid.” Afta dat, tɔk smɔl bɔt di magazin we yu dɔn gi am.
17 We yu mit di wan we de oba di shɔp, yu kin tɔk se: “Wi dɔn si se biznɛs pipul dɛn kin want fɔ no ɔl wetin de apin. Di nyu Wachtawa (ɔ Awake!) gɛt fayn atikul insay we de tɔk bɔt sɔntin we de apin to wi ɔl.” Ɛksplen wetin i tɔk bɔt ɛn ɛnd di tɔk wit: “Wi shɔ se yu go ɛnjɔy fɔ rid am.”
18 If i gɛt wokman dɛn, ɛn dɛn nɔ bizi, yu kin tɔk bak se: “Duya, a kin tɔk to yu wokman dɛn kwik bɔt wetin a jɔs tɛl yu?” If i gri, mɛmba se yu bin dɔn tɔk se yu nɔ go te, ɛn di bɔsman go de tink se yu fɔ kip to yu wɔd. If ɛni wokman go lɛk fɔ tɔk lɔng wit yu, i go fayn fɔ go mit am na in os.
19 Dis biɛn tɛm, sɔm pɔblisha dɛn na wan smɔl tɔŋ jɔyn wan sakit ovasia fɔ go prich na shɔp dɛn. Sɔm pan di pɔblisha dɛn bin de fred we dɛn jɔs bigin bikɔs dɛn nɔ wande prich dis kayn we. Bɔt afta sɔm tɛm dɛn lɛf fɔ fred ɛn dɛn bigin ɛnjɔy fɔ prich. I nɔ rich wan awa, dɛn bin ebul tɔk to 37 pipul dɛn, gi 24 magazin dɛn ɛn 4 smɔl buk dɛn. Wan brɔda kam si se ilɛk i tek wan mɔnt i nɔ go ebul fɔ tɔk to bɔku pipul dɛn di we aw i bin ebul fɔ tɔk to dɛn insay da shɔt tɛm de we dɛn bin de prich na dɛn shɔp dɛn.
20 Mek chans fɔ Prich: Jizɔs nɔ bin de prich frɔm os to os nɔmɔ. I bin de yuz ɛni chans we i gɛt fɔ prich di gud nyus. (Mat. 9:9; Lyuk 19:1-10; Jɔn 4:6-15) Lɛ wi tɔk bɔt aw sɔm pɔblisha dɛn dɔn prich ɛnitɛm dɛn gɛt chans.
21 Sɔm pɔblisha dɛn kin prich to mama ɛn papa dɛn we kin de wet fɔ tek dɛn pikin dɛn we skul kɔmɔt. Sɔm mama ɛn papa dɛn kin dɔn kam lɛk 20 minit so bifo skul de kɔmɔt, so dɛn pɔblisha ya kin yuz da tɛm de fɔ tɔk to dɛn bɔt di Baybul.
22 Bɔku payɔnia dɛn kin fɛn pipul dɛn we rili want fɔ no mɔ bɔt wan patikyula tɔpik we de na wi magazin. Fɔ ɛgzampul, wan sista bin kɛr di Disɛmba 22, 1995, Awake! go na siks skul dɛn we de na di eria usay in kɔngrigeshɔn fɔ prich. Dis magazin bin gɛt di atikul we se “Schools in Crisis.” Dɛn bin gladi fɔ rid am. I go bak na dɛn ɔfis dɛn we gɛt fɔ du wit famili biznɛs, wit magazin dɛn we de tɔk bɔt famili ɛn aw dɛn nɔ de trit pikin dɛn fayn. Dis mek dɛn arenj wit am fɔ de go wit ɛni magazin we de tɔk bɔt dɛn sem tɔpik dɛn de. Insay di Mach 8, 1996, Awake! wan atikul de de we de tɔk bɔt pipul dɛn we nɔ gɛt wok. Di sista bin kɛr dis Awake go na wan ɔfis we gɛt fɔ du wit pipul dɛn we nɔ gɛt wok. I bin tɔk se di pipul dɛn we i mit de bin “rili gladi.”
23 Wan distrikt ovasia bin tɔk se i ɛn in wɛf kin prich ɛnitɛm we dɛn gɛt chans we dɛn de go bay bay. Dɛn kin go bay bay tɛm we pipul dɛn nɔ bɔku tumɔs insay di shɔp dɛn ɛn di wan dɛn we de insay de nɔ de rɔsh. Dɛn bin tɔk se bɔku pipul dɛn kin lisin fayn.
24 Tray Tranga Wan fɔ Prich Ɔlsay: Fɔ sho se wi de kɔntinyu fɔ du wetin wi dɔn prɔmis Jiova, wi fɔ de yuz ɛni chans we wi gɛt fɔ tɔk bɔt in Kiŋdɔm ɛnisay wi de. Fɔ lɛ wi prich to pipul dɛn tɛm we fayn fɔ dɛn, wi nɔ fɔ du tin dɛn nɔmɔ we wi want. Wi fɔ “fɛn ɔl kayn we so dat sɔm pipul mɔs sev.” Ɔl di wan dɛn we dɔn gi dɛn layf to Jiova fɔ ebul tɔk lɛk apɔsul Pɔl we i se: “Ɔl dɛn tin ya we a de du na fɔ mek di Gud Nyuz go prɛd ɔlɔbɔt, ɛn mek mi ɛn una gɛt pan dɛn blɛsin we di Gud Nyuz de briŋ fɔ wi.”—1 Kɔr. 9:22, 23.
25 Pɔl bin tɔk bak se: “So a gladi we a de fil prawd bɔt di sik we a sik, so dat a kin no se Krays in pawa de wit mi. . . . Bikɔs di tɛm we a nɔ ebul fɔ ɛp misɛf, na da tɛm de a gɛt Gɔd in pawa.” (1 Kɔr. 12:9, 10) I bin min se, nɔn pan wi nɔ go ebul du dis wok ya so fayn bay wi yon pawa. Wi nid fɔ pre to Jiova fɔ in oli spirit. If wi pre to Gɔd fɔ ɛp wi, wi shɔ se i go ansa wi prea. Dɔn di lɛk we wi lɛk pipul dɛn go mek wi fɛn ɔlkayn we fɔ prich di gud nyus to dɛn ɛnisay we dɛn de. Insay dɛn wik ya we de kam, yu go want fɔ tray wan pan di we dɛn fɔ prich ɔlsay we dis pat pan di Kiŋdɔm Ministri tɔk bɔt?