Aw Yu Go Stɔdi Pɔsin di Baybul Gud Gud Wan?
1. Us wok pɔblisha dɛn we de du Baybul stɔdi gɛt?
1 Nɔbɔdi nɔ go sav Jiova pas in “briŋ di pɔsin” fɔ kam sav am. (Jɔn 6:44) Bɔt stil, pɔblisha dɛn we de du Baybul stɔdi fɔ du wetin dɛn ebul fɔ ɛp pipul dɛn fɔ kam nia dɛn Papa we de na ɛvin. (Jems 4:8) Dis min se wi fɔ pripia. Fɔ jɔs rid di kwɛstyɔn we de fɔ di paregraf we una de tɔk bɔt nɔ du fɔ ɛp yu studɛnt fɔ ɔndastand wetin una de tɔk bɔt ɛn fɔ mek i go bifo.
2. Wetin go apin we wi stɔdi pɔsin di Baybul gud gud wan?
2 Fɔ du Baybul stɔdi gud gud wan, pɔblisha dɛn fɔ ɛp dɛn studɛnt dɛn fɔ (1) ɔndastand wetin di Baybul de tich, (2) gri wit wetin di Baybul de tich, ɛn (3) du wetin di Baybul de tich. (Jɔn 3:16; 17:3; Jems 2:26) I kin tek sɔm mɔnt fɔ ɛp di pɔsin fɔ du dɛn tin dɛn ya. Bɔt ɛniwan pan dɛn tin ya we di pɔsin du, de sho se in padi biznɛs wit Jiova de tayt ɛn i want fɔ gi in layf to Jiova fɔ sav am.
3. Wetin mek gud ticha dɛn kin aks kwɛstyɔn dɛn we go mek pɔsin tɔk wetin i tink?
3 Wetin di Baybul Stɔdi De Tink Bɔt?: Fɔ no if wi Baybul stɔdi de ɔndastand ɛn gri wit wetin i de lan, nɔto wi nɔmɔ fɔ de tɔk, wi fɔ mek di pɔsin tɔk wetin i tink. (Jems 1:19) I ɔndastand wetin di Baybul se bɔt di tɔpik we una de tɔk bɔt? I ebul fɔ ɛksplen di tɔpik fɔ insɛf? Wetin i tink bɔt wetin i dɔn lan? I biliv se sɛns de pan wetin di Baybul tɔk? (1 Tɛs. 2:13) I ɔndastand se wetin i de lan fɔ mek i difrɛn we i kam pan di we aw i de liv in layf? (Kɔl. 3:10) Fɔ mek wi go ebul fɔ ansa dɛn kwɛstyɔn dɛn de, wi fɔ tek tɛm aks kwɛstyɔn dɛn we go mek i tɔk wetin i tink, dɔn wi fɔ lisin.—Mat. 16:13-16.
4. Wetin wi fɔ du if i nɔ izi fɔ mek wi Baybul studɛnt ɔndastand ɔ du wetin i de lan frɔm di Baybul?
4 I kin tek sɔm tɛm fɔ chenj pɔsin in abit ɛn di we aw i de tink. (2 Kɔr. 10:5) Wetin wi fɔ du if di pɔsin nɔ gri wit wetin i de lan ɔ i nɔ gri fɔ du wetin i de lan? Wi fɔ peshɛnt wit di pɔsin fɔ mek Gɔd in Wɔd ɛn in oli spirit tɔch in at. (1 Kɔr. 3:6, 7; Ibru 4:12) Bifo yu fos di pɔsin, i go bɛtɛ fɔ mek una tɔk bɔt ɔda tɔpik if i nɔ izi fɔ mek di pɔsin ɔndastand ɔ du wetin di Baybul se. We wi lɛk di pɔsin ɛn kɔntinyu fɔ peshɛnt fɔ tich am frɔm di Baybul, di pɔsin go chɛnj as tɛm de go.