Di 2015 Tiokratik Ministri Skul Go Ɛp Wi fɔ Rili Sabi Tich Fayn

¹ Devid we na bin wan pan di man dɛn we rayt di Sam buk bin se: “E PAPA GƆD, a de pre se mek ɔl wetin de kɔmɔt na mi mɔt, ɛn ɔl wetin de na mi at, bi wetin yu go gladi fɔ tek na mi an. Yu na mi PAPA GƆD we de kɔba mi ɛn sev mi!” (Sam 19:14) Wisɛf want wetin wi de tɔk fɔ mek Jiova gladi bikɔs wi valyu di chans we wi gɛt fɔ tɔk tru na di kɔngrigeshɔn ɛn na fil savis. Di Tiokratik Ministri Skul na wan we we Jiova de yuz fɔ tren wi fɔ sabi prich. Dɛn kin du dis trenin na lɛk 111,000 kɔngrigeshɔn ɛni wik ɔlsay na di wɔl. I dɔn ɛp brɔda ɛn sista dɛn ɔlsay na di wɔl we de du ɔlkayn wok fɔ fit fɔ prich di gud nyus, fɔ ebul mek pɔsin biliv sɔntin we yu tɔk, fɔ tek tɛm tɔk, ɛn fɔ tɔk wit maynd.—Akt 19:8; Kɔl. 4:6.

² Insay di skul fɔ 2015, wi go yuz Wetin Wi Kin Lan Frɔm Gɔd in Wɔd ɛn di “Glossary of Bible Terms,” we de na di New World Translation ɛn sɔm tin dɛn we de na di Insight on the Scriptures, Vɔlyum 1. Dɔn dɛn dɔn adjɔst di tɛm fɔ di Baybul aylayt ɛn Tɔk Nɔmba 1. Na dɛn chenj dɛn ya wit wetin fɔ du wi go tɔk bɔt na di ɔda paregraf dɛn.

³ Baybul Aylayt: Brɔda dɛn we de du dis pat gɛt tu minit fɔ tɔk bɔt wan tin we dɛn lɛk ɛn we di kɔngrigeshɔn nid fɔ du frɔm di Baybul ridin fɔ di wik. If di brɔda pripia fayn, dat go mek i tɛl di kɔngrigeshɔn sɔntin we go bɛnifit dɛn insay di tɛm we i fɔ yuz fɔ da pat de. Afta dat di ɔdiɛns go gɛt siks minit fɔ kɔmɛnt bɔt tin dɛn we dɛn lɛk fɔ 30 sɛkɔn ɔ i nɔ fɔ rich. Dis min se pɔsin fɔ pripia fayn ɛn tren insɛf fɔ mek fayn kɔmɛnt insay 30 sɛkɔn, bɔt dat na gud trenin fɔ wi. Dat go gi ɔda pipul dɛn chans fɔ mek dɛn yon kɔmɛnt bɔt wetin dɛn lan na di Baybul ridin.

⁴ Tɔk Nɔmba 1: Dɛn dɔn ridyus di tɛm fɔ di Baybul ridin to tri minit ɔ i nɔ fɔ rich. Na smɔl say di brɔda gɛt fɔ rid. Di wan dɛn we gɛt dis tɔk fɔ praktis am bɔku bɔku tɛm bay we dɛn de rid am lawd wan ɛn tray fɔ ebul kɔl wɔd dɛn fayn so dat ɔda pɔsin go ɔndastand wetin i de rid. Jiova in pipul dɛn ɔl fɔ tray fɔ rid fayn, bikɔs fɔ rid na impɔtant pat na wi wɔship. Wi rili gladi we bɔku pan wi pikin dɛn sabi rid fayn! Wi de tɛl mama ɛn papa dɛn tɛnki we dɛn de ɛp dɛn pikin dɛn fɔ rid fayn.

⁵ Tɔk Nɔmba 2: Dis na pat we sista fɔ du fɔ fayv minit. Na di tim we de de i fɔ yuz. If di tɔk kɔmɔt na di New World Translation ɔ na di Wetin Wi Kin Lan Frɔm Gɔd in Wɔd buk, i fɔ du lɛk aw wi kin prich na fil savis na di eria usay di kɔngrigeshɔn de. If di tɔk na bɔt pɔsin frɔm di Insight on the Scriptures, Vɔlyum 1, fɛn skripchɔ dɛn we tɔk bɔt am ɛn sho wetin wi kin lan frɔm da pɔsin in ɛgzampul. I kin ad ɔda skripchɔ dɛn we fit wit di tim. Di skul ovasia go gi am wan pɔsin fɔ ɛp am.

⁶ Tɔk Nɔmba 3: Dis na pat we brɔda ɔ sista fɔ du fɔ fayv minit. If na sista de du dis pat, i fɔ du am lɛk Tɔk Nɔmba 2. If di tɔk kɔmɔt na di Insight buk ɛn na brɔda de du am, i fɔ gi am lɛk tɔk ɛn i fɔ de tink bɔt di ɔdiɛns. I fɔ tɔk mɔ bɔt di tim, yuz di kɔrɛkt skripchɔ dɛn we fit fɔ di tim, ɛn sho wetin wi kin lan frɔm di Baybul ɛgzampul in stori.

⁷ Wan Nyu we fɔ Du Tɔk Nɔmba 3 fɔ Brɔda Dɛn: If na di New World Translation, di tɔk kɔmɔt, i fɔ du am lɛk aw i go du famili wɔship ɔ fil savis. Di skul ovasia go gi am sɛtin ɛn pɔsin we fɔ ɛp am. Di pɔsin we de ɛp am fɔ bi in fambul ɔ brɔda we de na di kɔngrigeshɔn. I kin yuz ɔda skripchɔ dɛn we tɔk bɔt di tim. Sɔntɛnde na ɛlda dɛn go gi dis pat. Di ɛlda kin fɛn pɔsin fɔ ɛp am, ɛn in sɛtin we i want fɔ yuz. I go rili ɛnkɔrej wi fɔ si ɛlda dɛn ɛn dɛn famili ɔ ɔda brɔda sho wi aw fɔ tich.

⁸ Fɔ Gi Advays: Di skul ovasia go yuz tu minit fɔ tɛl di studɛnt tɛnki ɛn fɔ tɔk tin we go bɛnifit ɔlman afta di tɔk. Dis advays fɔ kɔmɔt na di Benefit From Theocratic Ministry School Education buk. We di skul ovasia de kɔl di studɛnt, i nɔ fɔ tɔk us pɔynt di studɛnt de du. Afta di studɛnt dɔn, di skul ovasia fɔ tɛl am tɛnki, tɔk bɔt di pɔynt we i du, tɔk bɔt wetin mek i se di studɛnt du wɛl, ɔ tek tɛm ɛksplen wetin mek di studɛnt fɔ pe atɛnshɔn to wan patikyula pɔynt.

⁹ Mɛmba se di advays fɔm fɔ di studɛnt de na pej 79 to pej 81 na di Ministry School buk. Afta di studɛnt dɔn fɔ gi in tɔk, di skul ovasia kin rayt smɔl smɔl tin na di studɛnt in buk ɛn i kin tɔk wit am afta di mitin fɔ aks am if i bin du di omwɔk we de na di advays say. I kin tɛl am tɛnki ɛn advays am bɔt sɔm pɔynt dɛn afta mitin ɔ ɔda tɛm. Di studɛnt fɔ si di chans we di skul ovasia de yuz fɔ tɔk to am wan to wan as tin we go ɛp am fɔ go bifo na di kɔngrigeshɔn.—1 Tim. 4:15.

¹⁰ If di studɛnt yuz mɔ tɛm pas di wan we i fɔ yuz, di skul ovasia fɔ mek sayn fɔ mek i no se di tɛm dɔn dɔn. I kin yuz bɛl ɔ mek smɔl nɔys. Di studɛnt fɔ ɔndastand dis ɛn dɔn wetin i bin de tɔk so dat i go kɔmɔt na di stej.—Rid di Ministry School buk, pej 282, par. 4.

¹¹ Dɛn de ɛnkɔrej ɛnibɔdi we fit, fɔ jɔyn di Tiokratik Ministri Skul. (Rid di Ministry School buk, pej 282, par. 6.) Dis tichin program we Jiova dɔn mek fɔ wi de ɛp wi fɔ prich ɛn tich pipul dɛn di gud nyus bɔt di Kiŋdɔm. I de mek wi nɔ de shem fɔ tɔk bɔt am ɛn wi de tɔk bɔt am wit rɛspɛkt ɛn lɔv. Jiova rili gladi we ɔl di wan dɛn we de bɛnifit frɔm di skul de prez am!—Sam 148:12, 13; Ayz. 50:4.