Kɔntinyu fɔ Go Bifo As Pɔsin We De Prich
1. Us ɛgzampul dɛn de bɔt fɔstɛm Kristian dɛn we sho se wi fɔ go bifo as pipul dɛn we de prich?
1 Kristian dɛn fɔ go bifo as pipul dɛn we de prich. Na dat mek Jizɔs bin tren in disaypul dɛn fɔ kɔntinyu fɔ go bifo pan di prichin wok. (Lyuk 9:1-5; 10:1-11) Na dat mek Akwila ɛn Prisila bin mek padi wit Apɔlɔs ɛn “tɛl am mɔ bɔt Gɔd yon we.” (Akt 18:24-26) Na da sem rizin de mek pan ɔl we Timoti bin gɛt ɛkspiriɛns fɔ tich, Pɔl bin ɛnkɔrej am fɔ kɔntinyu fɔ ‘mek ɔlman si se’ i de go bifo. (1 Tim. 4:13-15) Ilɛk aw lɔng wi dɔn de wok fɔ di Masta as pipul dɛn we de prich di gud nyus, wi nid fɔ kɔntinyu fɔ go bifo wit di we aw wi de prich.
2. Aw wi kin lan frɔm ɔda pipul dɛn?
2 Lan Frɔm Ɔda Pipul Dɛn: Wan tin we go ɛp wi fɔ go bifo na fɔ lan frɔm ɔda pipul dɛn. (Prɔv. 27:17) Na dat mek wi fɔ pe atɛnshɔn we ɔda pɔblisha de prich. Aks pɔblisha dɛn we sabi prich fayn fɔ ɛp wi wit wan patikyula tin ɛn lisin gud wan we dɛn de tɔk. (Prɔv. 1:5) Yu nɔ shɔ bɔt aw fɔ du ritɔn visit, aw fɔ stat Baybul stɔdi, ɔ aw fɔ yuz ɔda kayn we fɔ prich? Nɔ wet mek yu grup ovasia ɔ ɔda pɔblisha we gɛt ɛkspiriɛns aks yu if yu nid ɛp. Yu fɔs aks. Mɛmba bak se Jiova in oli spirit go ɛp yu, so na fɔ de pre to am fast fast fɔ mek i gi yu di oli spirit.—Lyuk 11:13.
3. Aw wi fɔ fil if pɔsin gi wi advays ilɛksɛf nɔto wi aks am?
3 Nɔ vɛks if pɔsin advays yu bɔt aw fɔ go bifo we yu de prich, ilɛksɛf nɔto yu aks am fɔ ɛp yu. (Ɛkli. 7:9) Lɛk Apɔlɔs, wi fɔ ɔmbul ɛn gladi fɔ di advays. If yu du dat i sho se yu gɛt sɛns.—Prɔv. 12:15.
4. Us rizin Jizɔs bin gi bɔt wetin mek wi fɔ go bifo as pipul dɛn we de prich?
4 Wi Go Gi Gɔd Glori we Wi Go Bifo: Jizɔs bin yuz parebul fɔ ɛnkɔrej in disaypul dɛn fɔ go bifo as pipul dɛn we de prich. I bin kɔmpia insɛf to tik ɛn di anɔyntɛd dɛn na di branch dɛn we de pan di tik. I bin se in Papa de klin ɛni branch we de bia frut “so dat i kin bia mɔ.” (Na wi mek am italiks) (Jɔn 15:2) Jɔs lɛk aw di wan we gɛt di tik want fɔ mek di branch dɛn bia mɔ frut, na so Jiova want fɔ mek wi kɔntinyu fɔ go bifo we wi de “tɔk” bɔt am ɛn bia mɔ frut. (Ibru 13:15) Aw wi go bɛnifit we wi go bifo as pɔsin we de prich? Jizɔs gi wi di ansa. I bin se: “If una du plɛnti gud tin, una go sho pipul aw mi Papa wɔndaful.”—Jɔn 15:8.