Lɛ Wi Tray fɔ Du Dis we Wi De Prich—Prich na Say Usay Pipul dɛn De Du Biznɛs

Wetin Mek Dis Impɔtant? Bikɔs bɔku pipul dɛn kin wok ol de, di bɛst we fɔ prich di gud nyus bɔt di Kiŋdɔm to dɛn, na we wi go prich na di say usay dɛn de wok. Wi kin ɛnjɔy fɔ prich na say usay pipul dɛn de du biznɛs bikɔs wi nɔ go mit say usay pɔsin nɔ de na os ɛn di wan dɛn we de wok de kin tɔk fayn to pipul dɛn we dɛn tink se go bi dɛn kɔstɔma. Fɔ mek pɔblisha dɛn go ebul prich fayn, dɛn fɔ tek tɛm tɔk, dɛn fɔ no ustɛm fɔ bigin tɔk to pɔsin, ɛn dɛn fɔ tek tɛm wit di we aw dɛn de drɛs. (2 Kɔr. 6:3) So di savis ovasia fɔ de chɛk di tɛm dɛn we dɛn de prich na say dɛn usay dɛn de du biznɛs ɛn di wan dɛn we kin prich de.

Aw fɔ Du Am?

We yu de pripia wetin yu plan fɔ tɔk, nɔ pripia fɔ tɔk bɔt sɔntin we go mek yu tɔk bɔku. If wi tek di wokman in tɛm tumɔs, i nɔ go gi wi chans fɔ tɔk to am ɔda tɛm.
Fɛn tɛm we yu no se dɛn nɔ kin bizi lɛk we dɛn jɔs opin.
Tray fɔs fɔ tɔk to di bɔs ɔ di pɔsin we de oba di ples. Smayl ɛn tɔk to di pɔsin lɛk padi. Yu kin tɔk se, “Wi kam fɛn una na una wokples bikɔs i nɔ izi fɔ mek wi mit una na os.” Prich to am kwik ɛn gi am wan trakt, magazin, ɔ ɔda tin we wi kin yuz fɔ prich. Fɔ lɛ dɛn nɔ fil se wi kam sɛl sɔntin, i go bɛtɛ lɛ wi nɔ tɔk bɔt aw pipul dɛn kin gi mɔni fɔ mek di wok go bifo pas nɔmɔ dɛn aks wi aw wi kin gɛt mɔni fɔ sɔpɔt wi wok.
If di pɔsin we de oba di ples tɔk fayn to wi, aks am if i go gri fɔ mek una tɔk to di ɔda wokman dɛn. Na sɔm biznɛs ples dɛn, i kin bɛtɛ fɔ mek wi aks if wi kin lɛf sɔm pan wi buk ɛn magazin dɛn na di kawnta usay ɔlman go si am.
Tek tɛm tɔk, no ustɛm fɔ tɔk to pɔsin, ɛn ajɔst to wetin yu mit. Fɔ ɛgzampul, if wokman de tɔk to kɔstɔma ɔ i bizi, wet te i dɔn fɔ du wetin i de du bifo yu go mit am fɔ tɔk to am.

Tray fɔ Du Dis Insay Dis Mɔnt:

Di nɛks tɛm we una de du una Famili Wɔship, una kin praktis shɔt we dɛn fɔ prich so dat if dɛn se mek una prich na say dɛn usay pipul dɛn kin go du biznɛs una go sabi prich de.