Na Jizɔs in Day​—Mek di Wan dɛn We Dɔn Day Go Gɛt Layf Bak

Di Mɛmorial de gi wi di chans fɔ tink bɔt di blɛsin dɛn we wi go gɛt tumara bambay. Na di day we Jizɔs day mek am pɔsibul, fɔ mek di wan dɛn we dɔn day gɛt layf bak. Jiova nɔ bin ɛva want fɔ mek mɔtalman day. Na dat mek wan pan di tin dɛn we de mek wi rili fil bad na we di wan dɛn we dɛn lɛk day. (1Kɔr 15:​26) Jizɔs bin fil am we in disaypul dɛn bin de kray we Lazarɔs bin day. (Jɔn 11:​33-35) Bikɔs Jizɔs rili fiba in Papa, na dat mek wi shɔ se Jiova insɛf kin fil am we di wan dɛn we wi lɛk day. (Jɔn 14:​7) Jiova rili de wet fɔ di tɛm we i go gi in savants dɛn layf bak, ɛn wisɛf fɔ wet fɔ da tɛm de.—Job 14:​14, 15.

Ɛnti Jiova na Gɔd we ɔganayz, i mek sɛns fɔ biliv se i go ɔganayz di we aw i go gi layf bak to di wan dɛn we dɔn day. (1Kɔr 14:​33, 40) Da tɛm de bɛrin nɔ go de igen, na wɛlkɔm wi go de wɛlkɔm di wan dɛn we dɔn gɛt layf bak. We yu at rili pwɛl bikɔs pɔsin we yu lɛk day, yu kin tink gud wan bɔt di tɛm we di wan dɛn we dɔn day go gɛt layf bak? (2Kɔr 4:​17, 18) Yu kin tɛl Jiova tɛnki fɔ di day we i mek Jizɔs kam day fɔ wi ɛn we i ɛp wi fɔ no frɔm di Baybul se di wan dɛn we dɔn day go gɛt layf bak?—Kɔl 3:​15.

• Us wan pan yu padi ɛn fambul dɛn we yu go rili want fɔ si bak?

• Us wan pan di pipul dɛn we di Baybul tɔk bɔt we yu go rili want fɔ si ɛn tɔk to?