Frɔm we Gɔd Mek di Wɔl te di Ebi Ren Kam

Udat mek di ɛvin ɛn di wɔl? Udat mek di san, di mun, di sta dɛn ɛn ɔltin we de na di wɔl? Di Baybul tɛl wi se na Gɔd mek dɛn ɔl. So dis buk ya bigin wit stori dɛn na di Baybul we de tɔk bɔt di tin dɛn we Gɔd mek.

Wi go lan se, di fɔs tin dɛn we Gɔd mek na pipul dɛn we tan lɛk am. Dɛn na enjɛl dɛn. Bɔt Gɔd mek di wɔl fɔ wi mɔtalman. So Gɔd mek di fɔs man ɛn uman we nem Adam ɛn Iv, ɛn put dɛn na wan fayn gadin. Bɔt dɛn nɔ yɛri Gɔd in wɔd, ɛn na dat mek dɛn nɔ ebul fɔ de sote go.

I tek 1,656 ia frɔm we Gɔd mek Adam te di Ebi Ren kam. Insay da tɛm de, bɔku bad pipul dɛn bin de. Setan ɛn in bad enjɛl dɛn bin de na ɛvin. Dɛn na spirit. Wi nɔ de si dɛn atɔl. Ken ɛn ɔda bɔku bad pipul dɛn bin de na di wɔl. Ɛn ɔda pipul dɛn bin de na di wɔl we gɛt trɛnk pasmak. Semweso, gud pipul dɛn bin de na di wɔl. Sɔm pan dɛn na Ebɛl, Inɔk, ɛn Noa. Insay Pat WAN wi go lan bɔt ɔl dɛn pipul ya so ɛn di tin dɛn we dɛn du.