Gud Pikin ɛn Bad Pikin

LUK Ken ɛn Ebɛl naw. Dɛn tu dɔn tɔn big man. Ken na fama. I de plant frut ɛn ɔda tin dɛn fɔ it.

Ebɛl na shɛpad. I lɛk fɔ mɛn ship dɛn frɔm we dɛn smɔl te dɛn big. Ɛn we dɛn big, Ebɛl kin gɛt bɔku ship dɛn fɔ mɛn.

Wan de, Ken ɛn Ebɛl mek sakrifays to Gɔd. Ken kam wit sɔm pan di tin dɛn we i de plant. Ɛn Ebɛl kam wit di ship dɛn we fayn pas ɔl in ɔda ship dɛn fɔ mek di sakrifays. Jiova bin gladi fɔ Ebɛl ɛn in sakrifays. Bɔt Jiova nɔ bin gladi fɔ Ken ɛn in sakrifays. Yu no wetin mek?

Nɔto jɔs bikɔs Ebɛl in sakrifays bɛtɛ pas Ken in yon. Na bikɔs Ebɛl na gud man. I lɛk Jiova ɛn i lɛk in brɔda. Bɔt Ken bad; i nɔ lɛk in brɔda.

So Gɔd tɛl Ken mek i chenj in we. Bɔt Ken nɔ lisin. I vɛks bad bad wan bikɔs Gɔd lɛk Ebɛl pas am. So Ken tɛl Ebɛl se, ‘Kam lɛ wi go na fil.’ We na dɛn tu nɔmɔ de na di fil, na de Ken wap in brɔda at at wan. So in brɔda day. Nɔto bad tin Ken du so?

Gɔd stil de mɛmba Ebɛl pan ɔl we i dɔn day. Ebɛl bin gud, ɛn Jiova nɔ de ɛva fɔgɛt pɔsin we tan lɛk am. So, tɛm go kam we Jiova go gi Ebɛl layf bak. Da tɛm de, Ebɛl nɔ go ɛva day igen. I go de na dis wɔl sote go. Yu nɔ fil se i fayn fɔ mek wi tan lɛk Ebɛl?

Bɔt Gɔd nɔ de gladi fɔ pipul dɛn we tan lɛk Ken. So we Ken kil in brɔda, Gɔd pɔnish am fɔ dat. Gɔd mek i go fawe usay in fambul dɛn nɔ de. We Ken bin de go fɔ go de ɔdasay, i tek wan pan in sista dɛn fɔ bi in wɛf.

As tɛm de go, Ken ɛn in wɛf bigin bɔn pikin dɛn. Adam ɛn Iv dɛn ɔda pikin dɛn mared, ɛn dɛnsɛf bɔn pikin dɛn. I nɔ tu te, pipul dɛn bigin bɔku na di wɔl. Lɛ wi lan bɔt sɔm pan dɛn pipul ya so.