Bad Tin Apin to Dayna

YU DE si di kayn pipul dɛn we Dayna de go fɛn? I de go fɛn sɔm yɔŋ gyal dɛn we de na Kenan. Yu fil se in papa gladi bɔt dis? Fɔ no di ansa, mɛmba wetin Ebraam ɛn Ayzak bin tink bɔt di uman dɛn na Kenan.

Yu fil se Ebraam bin want mek Ayzak mared uman na Kenan? Nɔ, i nɔ bin want dat. Yu fil se Ayzak ɛn Ribɛka bin want mek Jekɔb mared Kenanayt uman? Nɔ, dɛnsɛf nɔ bin want dat. Yu no wetin mek?

Na bikɔs di pipul dɛn na Kenan de wɔship lay lay gɔd dɛn. I nɔ fayn fɔ mared dɛn pipul ya, ɛn i nɔ fayn bak fɔ mek padi wit dɛn. So wi shɔ se Jekɔb nɔ bin gladi we in gyal pikin bin de mek padi wit dɛn Kenanayt uman ya.

Wan bad tin apin to Dayna. Yu de si da Kenanayt man na di pikchɔ we de wach Dayna? Na in nem Shɛkɛm. Wan de, we Dayna kam fɛn di Kenanayt uman dɛn, Shɛkɛm fos am fɔ ledɔm wit am. Dis na bad tin bikɔs na man ɛn uman nɔmɔ we dɔn mared fɔ ledɔm togɛda. Dis bad tin we Shɛkɛm du to Dayna kam wit bɔku prɔblɛm.

We Dayna in brɔda dɛn yɛri bɔt wetin dɔn apin, dɛn at wam bad bad wan. Simyɔn ɛn Livay vɛks te dɛn tek sɔd ɛn go fɛt di man dɛn we de na di tɔŋ usay Shɛkɛm de. Dɛn ɛn dɛn brɔda dɛn kil Shɛkɛm ɛn ɔl di ɔda man dɛn we de na di tɔŋ. Jekɔb vɛks fɔ dis bad tin we in pikin dɛn du.

Wetin mek ɔl dɛn bad tin ya apin? Na bikɔs Dayna mek padi wit pipul dɛn we nɔ de du wetin Gɔd in lɔ se. Wi nɔ fɔ mek padi wit dɛn kayn pipul ya, nɔto so?