Frɔm we di Izrɛlayt dɛn Kɔmɔt na Ijipt te dɛn Gɛt Dɛn Fɔs Kiŋ

Mozis pul di Izrɛlayt dɛn kɔmɔt na Ijipt ɛn go wit dɛn na Mawnt Saynay. Na Mawnt Saynay Gɔd gi dɛn in lɔ dɛn. Leta, Mozis sɛn 12 man dɛn fɔ go luk aw Kenan tan. Bɔt tɛn pan dɛn man ya kam tɔk bad bɔt di ples. Dɛn mek di pipul dɛn want fɔ go bak na Ijipt. Gɔd pɔnish di Izrɛlayt dɛn bikɔs dɛn nɔ biliv am. I mek dɛn waka waka fɔ 40 ia na di ɛmti land usay pɔsin nɔ go ebul de.

Afta ɔl dis, dɛn pik Jɔshwa fɔ bi di Izrɛlayt dɛn nyu lida fɔ kɛr dɛn go na Kenan. Jiova du bɔku mirekul dɛn fɔ ɛp di Izrɛlayt dɛn fɔ pul di land na di Kenanayt dɛn an. I mek Riva Jɔdan lɛf fɔ rɔn, ɛn i mek di wɔl we de rawnd Jɛriko fɔdɔm. Dɔn i mek di san nɔ go dɔŋ fɔ wan ol de. Afta siks ia, di Izrɛlayt dɛn pul di land na di Kenanayt dɛn an.

Na jɔj dɛn bin de rul di Izrɛlayt dɛn. Di jɔj dɛn bin rul na Izrɛl fɔ 356 ia, ɛn na Jɔshwa na bin di fɔs jɔj. Wi go lan bak bɔt ɔda jɔj dɛn lɛk Berak, Gidyɔn, Jɛfta, Samsin ɛn Samiɛl. Ɛn wi go lan bak bɔt sɔm uman dɛn lɛk Reab, Dɛbora, Jeɛl, Rut, Naomi ɛn Dilayla. Ɔltin na Pat TRI apin insay 396 ia.