Di Tɛnt fɔ Wɔship Gɔd

YU NO us os dis? Na wan spɛshal tɛnt fɔ wɔship Jiova. Di pipul dɛn bil am afta wan ia we dɛn kɔmɔt na Ijipt. Yu no udat tɛl dɛn fɔ bil am?

Na Jiova tɛl dɛn fɔ bil am. We Mozis bin de ɔp Mawnt Saynay, Jiova tɛl am aw dɛn fɔ bil di tɛnt. I tɛl am fɔ bil am wan kayn we we i nɔ go at fɔ lus in pat dɛn. Dis go mek dɛn ebul kɛr di pat dɛn go ɔdasay ɛn jɔyn dɛn bak. So we di Izrɛlayt dɛn bin de muf, dɛn bin de go wit di tɛnt.

If yu luk insay da smɔl rum we de oba yanda, yu go si wan bɔks. Da bɔks de na oli bɔks. Tu enjɛl dɛn we dɛn mek wit gold de pantap di oli bɔks. Wan enjɛl de wan say ɛn di ɔda wan de di ɔdasay. Gɔd rayt di Tɛn Kɔmandmɛnt bak pan tu flat ston dɛn bikɔs Mozis bin dɔn brok di fɔs wan dɛn. Dɛn ston ya de insay di oli bɔks. Ɛn wan pɔt we gɛt mana de insay de bak. Yu mɛmba wetin na mana?

Jiova pik Mozis in brɔda we na Erɔn, fɔ bi ay prist. Ay prist na di edman fɔ di man dɛn we de mek sakrifays fɔ pipul dɛn sin. Na Erɔn go de bifo di pipul dɛn we dɛn go de wɔship Jiova. Ɛn in pikin dɛn na prist dɛn. Prist na man we de mek sakrifays fɔ pipul dɛn sin.

Luk di ɔda rum na di tɛnt. I big pas da smɔl rum fafawe. Yu de si di bɔks we de pul smok? Na di ɔlta usay di prist dɛn de bɔn wan tin we dɛn de kɔl insɛns. Insɛns na tin we gɛt fayn smɛl. Lampolda we gɛt sɛvin lamp dɛn de insay de. Tebul sɛf de insay de. Dɛn kin put 12 bred pantap di tebul.

Wan big bol we ful-ɔp wit wata de insay di kɔmpawnd. Di prist dɛn kin yuz di wata fɔ was dɛn an ɛn dɛn fut. Big ɔlta bak de de. Na de dɛn kin bɔn di animal dɛn we dɛn dɔn kil fɔ sakrifays to Jiova. Di tɛnt fɔ wɔship bin de midul usay di Izrɛlayt dɛn de, ɛn di Izrɛlayt dɛn bin de rawnd am.